ترەمپ: فرە سەختە ئەرا ئیران دووارە بەرنامەی ئەتۆمیی دروس بکەێد چوینکە خەرجی فرە گرانە
شەفەق نيوز/ دۆناڵد ترەمپ سەرۆک ئەمریکا، ئمڕوو چوارشەممە، وت: فرە سەختە ئەرا ئیران دووارە بەرنامەی ئەتۆمیی دروس بکەێد، دویای گورزەیل واشینتۆن لەبان دامەزراوەیلی.
ترەمپ لە قسەیل رووژنامەوانی لە لاهایەو وت: بومبەیل ئیمە ویرانکاری تەواویگ وە دامەزراو فۆردو رەسانن، و گشت شوینەیل ئەتۆمی ئیران وەتەواوی ویران کردیمن.
وتیش: ئیران جەبەخانەیل فرەیگ داشت، وەلێ ئیمە داغانیان کردیمن، و بەرنامەی ئەتۆمی ئیران ئەرا دەیان ساڵ دادەودویا.
ترەمپ وتیش: فرە سەختە ئەرا ئیران دووارە بەرنامەی ئەتۆمیی دروس بکەێد، کە وە درویژایی ساڵەیل ملیارا دۆلار لەباتی خەرج کرد، و تەقەلای دووارە دروسکردنی فرە گران نیشێد.
ترەمپ دیاری کرد کە ئەگەر دامەزراوەیل ئیران ویران نەکردیایمن وەنە ری وە رەسین ئەرا یەکلاییکردنیگ وەرد ئیرانیەیل نەوی، وتیش: گورزەیل ئیمە لە ئیران نایاب بوین، هەرچەگ ئیسرائیل وەپی نەکریا ویرانی بکەێد ئیمە کردیمنەی.
سەرۆک ئەمریکا دووپاتیش کرد کە ئیسرائیل لە رووژەیل دویایین لە پەلامارەیل مووشەک بالیستی ئیران فرە زەرەدمەن بوی کە بڕیگ لە بینایەیل ویران کردن، وتیش: لە کۆتایی ئەوەسا رەسیمنە جویریگ لە پەیوەندییەیل وەرد ئیران.
