ترەمپ سەرسامە: لافاوەیل تیکساس "كارەسات سەدەس".. و توومەت دیرکەفتن وەڵامدان

شەفەق نيوز- تیكساس

دۆناڵد ترەمپ سەرۆک ئەمریکا، باس سەرسامیی کرد لەو بڕ ویرانکاریە لە شوین لافاوەیل دویایین لە ویلایەت تیکساس، کە بویە مدوو کوشیان 120 کەس و بیسەروشوینی 130 کەس ترەک، دووپات لە پاڵپشتیکردنی ئەرا تەقەلایەیل وەهاناڕەسین وە وەرگریکردنی لە ئیدارەگەی و دەسەڵاتەیل ناوخوەیی ئەرا نواگیریکردن ئەو کارەساتە.

 قسەیل ترەمپ لە سەردانی وەگەرد میلانیای ژنی هات ئەرا شار كيرفيل لە کەرت كيێر، کە زەردمەنترین بویە لەو لافاوەیلە.

ترەمپ وت: کارەگە سەختە، و زریانەیل فرەیگ دیمە وەلێ وەیجویرە نەیمە، و باس بەرزەوبوین ناکاوی ئاست ئاوەگە جویر شەپوولیگ مەزن کرد لەناو زەریای ھێمن، کە خاسترین شەپوولسوارەیل جیهان رخیان لەلی چوود.

  سەرۆک ئەمریکا وە تویڕەیی وەڵام پرسیارەیل رووژنامەنویسەیل دا لەبان وەڵامدان دەسەڵاتەیل، دووپات کرد لە ئارەزووی ئەرا هاوکاریکردن وەرد تیمەیل رزگارکردن و خوەیبەخشەیل کرد، و ئەو پرسیارەیلە خستە پشتگووش کە باس کاریگەری کەمەوکردن هاز کارکەر کەن لە ئاژانسەیل فیدڕاڵی، لەناویان ئاژانس وەڕیەوبردن فریاکەفتن، لەبان وەڵامدانیان.

  ئەو لافاوەیلە کە وە کارەساتیگ باسی کریا کە هەر 100 ساڵ جاریگ رویدەێد، ویرانکاری فراوانیگ لە چەن ناوچەیگ لە ویلایەتەگە وەجیهیشت، دیارترینیان کەرت کیێر، کە خوەی تەنیا 96 مردن توومار کرد، و هیمان 130 کەس وە بیسەروشوین دریانەسە قەڵەم، لە وەختیگ دویەکە جمعە، کارەیل مینەکردن و رزگارکردن وەردەوام بوی.

لەناو قوربانیەیل، 27 دویەت و سەرپەرشتیارەیلیان لە کامپیگ تاوسانێ گیانیان لەدەسدان، هەناێ لافاوەگە وەناکاوەو لە چەم گوادالوپی ئەرایان هات.

 دەسەڵاتەیل لە تیکساس کەفتنەسە وەر رەخنەیل تیژیگ لەباوەت وەڵامدان سەرتاییان، وەتایبەت ئەوەگ پەیوەندی وە دیرکەفتن لە کلکردن پەیامەیل چووڵکردن زویوەزوی ئەرا دانیشتگەیل و سەردانکەرەیل وە درویژایی چەمەگە.

 وەلێ ترەمپ و ئەندامەیلیگ لە دیدارەگەی وەگەرد کار وەرپرسەیل وسیان، و دووپات کردن کە وەڵامدانیان زویوەزوی و کارا بویە.