تەقینەوەیگ لە مۆسکۆ وەرپرسیگ سەربازی پلەبەرز کوشێد
شەفەق نيوز/ مۆسکۆی پایتەخت رووسیا، رویداویگ ئەمنی توومار کرد، کە ماشینیگ لە ناوچەی بالاشيخا تەقیەو، و بویە هوکار کوشیان وەرپرسیگ سەربازی پلەبەرز.
دەسەی فریاکەفتن رووسیا وت: تەقیانەگە لە ئەنجام بومبیگ دانریاگ لەناو ماشینیگ رویدا، و تیمەیل لێکۆڵینەوە و بەڵگەیل تاوانی رەسینە شوین رویداوەگە، و لێکۆڵینەوەی زویوەزوی واز کردن.
هەرچەن وە فەرمی ناسنامەی قوربانیەگە ئاشکرا نەویە، وەلێ ڕاپۆرتەیلیگ راگەیانن دووپات کردن کە شایەت ياروسلاف موسكاليك، جیگر سەرۆک ئۆپراسیۆنەیل سەرەکی لە دەسەی ئەرکان گشتی کریاسە ئامانج، کە مەزەنە کریەێد مەوقەی تەقینەوەگە لەو شوینە بویە.
ئاژانس خەوەری رووسیا "بازا" کە نزیکە لە سەرچەوەیل ئەمنی، وت: بومبەگە لەناو ماشینیگ وسیاگ دانریاوێد، و مەوقەی رەدبوین ئەفسەرەگە وەلایەو، لە دویرەو تەقیاوە.
ئی رویداو ئەمنی نادیارە لە وەختیگ ناسک تیەێد، کە چەوەڕی کریەێد ئمڕوو سەرۆک رووسیا وەگەرد کلکریای ئەمریکی دانیشێد، لەسای کەشوهەوای وریایی و گەشبینی کە دۆناڵد ترەمپ سەرۆک ئەمریکا باس ئەگەر رەسین وەرەونواچگن لە کۆتاییهاوردن وە جەنگ لە ئۆکرانیا کرد.لە شوین ئەو تەقینەوەر زنجیرەیگ لە گورزەیل رووسیا وەبان کیێڤ پایتەخت ئۆکرانیا و چەن ناوچەیگ ترەک جیوەجی کریا، وەگەرد بانگواز ڤولوديمير زيلينسكی سەرۆک ئوکراینا وە ئاگربەسی کوتپڕ و نامەرجانە، و گرنگی وسانن پۆتین ئەرا کوتاییهاوردن وەی جەنگ وەردەوامە.
