ئبران "سیخوڕیگ مۆساد" دەێد لەسێدارە
شەفەق نیوز/ ئیران، ئمڕوو دووشەممە، لەسێدارەدان "سیخوڕ موساد" ئیسرائیلی ئیسماعیل فیکری راگەیان دویای تەواوکردن گشت ریکارەیل یاسایی.
ئاژانس خەوەری تەسنیم ئیران، لە بەیاننامەیگ کە ئاژانس شەفەق نیوز نووڕیەی، شەوەکی ئمڕوو فیکری لەسێدارە دریاس، لە ناو ئیران ئەرا گردەوکردن زانیاری ئەمنی و ئەنجامدان ئەرک شیوانن چالاک بویە، لەسێدارەدانەگە دویای تەواوبوین پرۆسەی دادوەری و پشتڕاستکردن سزاگە لەلایەن دەسەڵاتە باڵایەیل بویە.
هەرلیوا، ئاژانسەگە وتیش توومەت "المحاربة والإفساد في الأرض" دریا سێدارە، دیاری کرد کە فیکری لە کانوون یەکەم ساڵ 2023 لە ئۆپراسیۆنیگ ئاڵووز تەکنیکی و هەواڵگری لە ناو وڵات دەسگیر کریا، لە وەختیگ پەیوەندی وەرد سیخوڕی و تیرۆری رژیم زایۆنی داشتیە.
وەگورەی بەڵگەنامە فەرمییەیل ناو دۆسیەی قەزایی، ئیسماعیل فیکری لە مەوقەی هاوکاریی وەرد مۆساد، تەقەلای دزەپیکردن زانیاری هەستیار و نهێنی لەبان ئاسایش ئیران ئەرا دوژمنەیل ئەو وڵات داگە لە وەرانوەر پویل. لێکۆڵینەوەیل دەرخستنە کە فیکری لە ماوەی هاوکارییەگەی پەیوەندی وەرد دوو ئەفسەر مۆساد داشتیە.
ئاژانسەگە وتیش: "سەرەتا دویای دامەزرانن و پەسەنکردن لەلایەن ئەفسەر یەکەم مۆسادەو، ئیسماعیل فیکری دەسکردیە وە ئەنجامدان ئەرکە هەواڵگرییەیلی ئەرا مۆساد، و لە نووڕستن زانیاری لە ئامێرە ئەلیکترۆنییەیلی نامەنویسی ناوەین خوەی و ئەفسەرەگەی مۆساد دەرکەفت، کە رینمایی لەلی وەرگردنگە ئەرا گردەوکردن زانیاری تایبەت و رەساننی وە دەزگاگە".
وەگورەی بەڵگەنامەیل، فیکری تەقەلای رەسانن زانیاری نهێنی و ناسک، لەوانە سایت و بارەگا ئەمنییە هەستیارەیل، داتایەیل کەسەیلیگ دیاریکریای و ئەرک تایبەت ریخریایی داگە، ئی زانیاریەیلە لە ری شیوازیگ پەیوەندی ژیروەژیر ئەرا ئەفسەرەیل مۆساد کلکردگە.
وەگورەی ئاژانسەگە، دویای ماوەیگ هاوکاری وەرد ئەفسەر یەکەم، سەرەتای ساڵ ٢٠٢٢ دریاسە دەس ئەفسەر دویەم دەزگاگە وە ناو "ئەمیر"، "ئەمیر" میکانیزم نوویگ پەیوەندی ناسان و داوا لە فیکری کرد کە پلاتفۆرمیگ نوو دروس بکەێد کە لەلیەو راپۆرتە سەرەتاییەیل و نامە هەواڵگرییەیل کلبکەێد.
لە خود وەختەگە کە فیکری پەیوەندی وەرد ئەفسەرەیل مۆساد کردیاد، دەزگا ئەمنییەیل و هەواڵگرییەیل ئیران وە ریکارەیل تەکنیکی ئاڵووز چەودیاریکردن جموجویلی کردیان، ئەو و تووڕەگەی خریانە ژیر چەو.
دویای ئەنجامدان ئۆپەراسیۆنیگ ئەمنی و هەواڵگری و ئاشکراکردی نووڕ پەیوەندیدار وە مۆساد، ئیسماعیل فیکری لە مانگ کانوون دویەم ٢٠٢٣ دەسگیر کریاڕ ریکارەیل یاسایی لەبانی تەواو کریا، و شەوەکی ئمڕوو سزاگەی جیوەجی کریا.
