بایی 500 مليار دۆلار.. ئەميركا داوای نیم سامان کانزایی ئۆكرانيا کەێد
شەفەق نیوز/ مایک والتز سڵاکار ئاسایش نیشتمانی ئەمریکا ڕاگەیان کە بایەسە ڤۆلۆدیمیر زێلێنسکی سەرۆک ئۆکرانیا ڕەخنەیلی لە ئەمریکا کەمەو بکەێد و لە نزیکەو بنووڕێدە ڕێککەفتنەگە ئەرا رادەسکردن “نیمەی سامان کانزای وڵاتەگەی وە واشنتۆن”.
والتز باس پێشنیاریگ ئەمریکی کرد کە وەگورەی پێشنیارە کیێڤ سامانە سروشتییەیل و کانزا وە بەهای 500 ملیار دۆلار، لەوانەیش نەفت و گاز دەێدە واشنتۆن، لە وەرانوەر ئەو پاڵپشتییە ئەمریکا کە لە وەخت جەنگ پێشکەشی کردگە، یەیش بیجگە لەوەگ لە بانان دەسمیەتی ئۆکرانیا دەێد.
ئەو وەرپرس ئەمریکییە لە قسەیلی ئەرا فۆکس نیوز وتیش؛ دۆناڵد ترەمپ سەرۆک ئەمریکا بیزارە لە رەتکردن ئەو ئۆفەرە سکۆت بێسن، وەزیری گەنجینەی ئەمریکا هەفتەی گوزەشتە لەلایەن زیلێنسکییەو.
سڵاکار ئاسایش نیشتمانی لە کۆنگرەیگ رووژنامەوانی وت: بەرزەوبوین رەخنە تیژەیل ترەمپ لە زێلێنسکی "ڕەنگدانەوەی پەرەسەنین بیزاری ئیدارەی ئەمریکاس کە وە ئاستەنگییگ زانێد کە سەرۆک ئۆکرانیا ئەرا پەیاکردن ری کۆتایی وەپشتسەرنان لە جەنگ رووسیا دژ وڵاتەگەی.
قسەی والتز لە رووژیگ دویای ئەوە هات کە ترەمپ زێلێنسکی وە "دیکتاتۆر" باس کرد و هوشداریی وەپی دا کە "خاسترە وەزوی کام بنێد" ئەرا دانوسەنین ئەرا کۆتاییهاوردن وە جەنگەگە، ئەگەرنە "هاتی رخداری ئەوە بکەید کە وڵاتیگ نەوود ئەرا سەرکردایەتیکردن".
رووژ چوارشەممە، زێلێنسکی راگەیان کە ترەمپ لە "فەزای زانیاری ناڕاس" ژیەێد کە رووسیا دروسی کردگە.
لەلای ترەمپ، والتز وت: ببزارییەگەی لە زێلێنسکی فرەلایەنەو بوود بایەسە سوپاس و پیزانین قویلیگ داشتوود ئەرا ئەوە گەل ئەمریکا و باجدەرویل ئەمریکا کردنە، و ئەوەگ ترەمپ لە خول یەکەم خوەی کردگە و لەو وەختەو چە کردیمنە، بەشیگ لەو قسەیلە لە کیێڤەو دەرچگە، وەڕاسیەو و ئەو سووکایەتیە کە وە ترەمپ کریان جی قبوڵکردن نیین.
