بڕوا وە ئیران نەیریمن.. ئازەربایجان کار لە باڵیۆزخانەگەی لە تەهران وسنێد
2023-01-30T06:28:35+00:00
شەفەق نیوز/ خلاف خلافۆف جیگر وەزیر دەرەوەی ئازەربایجان، وسیان کار دیبلۆماسی لە باڵیۆزخانەی وڵاتەکەی لە تەهران راگەیان، دویای پەلاماریگ بویە هوکار کەفتن قوربانی وەرجە دوو رووژ.
خلافۆف لە قسەیلی ئەرا ئاژانس (ئازەرتاج) فەرمی وت: وڵاتەگەی بڕوا وە ئیران نیەکەێد لەبارەی بیوەیی فەرمانبەرەیل باڵیۆزخانەی لە تەهران، وتیش: قونسوڵخانەی ئازەربایجان لە شار تەبیز لە کاری وەردەوامە.
وتیش: ئیران جویر دەوڵەتیگ وەرپرسایەتی ئەو پەلامارە لەبان باڵیۆزخانەی وڵاتەگەی لە تەهران هەڵگرێد.
جیگر وەزیر دەرەوەی ئازەربایجان وت: ئیران وە شیوەیگ نا وەرپرسانە رەفتار کرد، دویای داواکرد وڵاتەگەی وە سەختکردن ریکارەیل ئەمنی لە دەورگرد باڵیۆزخانەگەی لە تەهران.
رووژ جمعەی گوزەشتە، کابرایگ تەقە لە باڵیۆزخانەی ئازەربایجان لە تەهران کرد، و بویە هوکار کوشیان کەسیگ و زەخمداری دوو کەس، لە پەلامارەیگ ک تەهران ئویشێد کەسایەتیە، لە وەختیگ باکو ئویشێد تیرۆریە.
