کارەساتیگ مرۆیی لە سودان.. ورسگی 13 کەس کوشێد و هەڕەشەی 21 هەزار دەێد
شەفەق نيوز/ "تووڕ پزشکەیل سودان"، ئمڕوو شەممە، مردن 13 پەنابەر سودانی لە ورسگی لەماوەی تەنیا یەک هەفتە، لەناو کەمپ پەنابەری قاقا لە چاد راگەیان، وەگەرد سەختەوبوین کارەساتییگ لە رەوشەیل تەندروسی و مرۆیی لەناو ئەو کەمپە.
تووڕەگە لە بەیاننامەیگ رەسیە ئاژانس شەفەق نیوز وت: ئەو کەمپە کە نزیکەی 21 هەزار پەنابەر سودانی هاناوی، زیان لە کەمی تیژیگ لە خوەراک و دەرمان دیرێد، وەگەرد بڵاوبوین بیماریەیل، لە ئەنجام نەویین پاڵپشتیکردن ناودەوڵ٦و پشتگووخستن ریخریاگەیل مرۆیی، هوشداری دا کە هەزاران کەفتنەسە وەر خود ئەو چارەنویسە ئەگەر وەزوی وەپییان نەڕەسن.
بەیانامەگە وتیش: نەهامەتی رووژ دویای رووژ زیایەو بوود، و پەنابەرەیل سودانی مەننەسە گی تا لە ورسگی و بیماریی بمرن، وەبی دەسوەردان کارا لە لایەنەیل ناودەوڵەتی، کە وە دەسپیچگ مەرزەیل تەمەڵی خوەیان پیچەو دەن.
تووڕەگە داوا لە ریخریاگەیل نەتەویی و مرۆیی کرد ئەرک رەوشتی خوەیان وەجی بارن، و زویوەزوی دەسبیەنەوەر، ئەرا دابینکردن دەسمیەتی خوەراک و دەرمان، و وسانن ئاوارەبوین زوورەملی کە هیلێد هەزاران خیزان سودانی لەو وەرسگیە وەرەو چارەنویس نادیاریگ بوان.
ئی کارەساتە وەگەرد زیایبوین جەنگ لەناو سەدان تیەێد، و پەلامارەیل چەکدار لە بورتسودان، کە زەخم پەنابەرەیل قویلەو کەێد، و سیمای مرۆیی ئاڵووزترەو کەێد، لەسای پشتگووشخستن ناودەوڵەتی لە ژیان گەلیگ لەژیر جەنگ و ورسگی ناڵێد.
