ژاپۆن خوارترین شمارەی زایین لە ماوەی 125 ساڵ توومار کەێد
شەفەق نیوز/ داتایەیل وەزارەت تەندروسی ژاپۆن، ئاشکرای داوەزیان شمارەی زایین لە ماوەی ساڵ گوزەشتە، ئەرا نۆهەم ساڵ لەبانیەک تا بڕەسێدە ئاستییگ پەیمانەیی کەمیگ.
ئەو کەمەوبوینە کە زویترە لە چەوڕیکریاگ، نشان دەێد کە ریکارەیل حکومەت لە نواگیریکردن داوەزیان شمارەی دانیشتگەیل و زیایبوین پیرەیل کارا نەوینە.
بەیاننامەیل وەزارەت تەندروسی دەرخستن مە 720 هەزار و998 کوورپە لە ساڵ 2024 لە ژاپۆن پەیا بوینە، کە داوەزیان وە ریژەی 5% وەرانەور ساڵ 2023، و یەیەش کەمترین شمارەی لەداڵگبوینە لە ژاپۆن لە وەختیگ دەسکردیەسە توومارکردن لە ساڵ 1899 تا ئیسە.
گەورەی ئەمیندارەیل ئەنجومەن وەزیرەیل، يوشيماسا هاياشی، ئەرا رووژنامەنویسەیل وت: باوەڕ دیریمن کە وە شیوەیگ کارا کۆنتڕوڵ داوەزیان شمارەی زایین نەکریاس، وتیش: حکومەت ئەوەسا وەردەوام بوود لە تەقەلای فراوانکردن بەرنامەی ئیوەتکردن مناڵەیل، و پاڵپشتیکردن ئەو خیزانەیلە کە مناڵ دیرن، وەگەرد زیایکردن مووچە و پشتگیریکردن ژن و ژنخوازین.
