نێچیرڤان بارزانی پرسەنامەی مردن پاشای نەرویج دەێد: خەفەت قۊلیگ دیرم ئەرا کوچکردنی

شەفەق نیوز- هەولێر

نێچیرڤان بارزانی، سەرۆک هەرێم کوردستان ئمڕوو جمعە، پرسەنامەی مردن پاشای نەرویج هارالد پەنجەم دا، و وت "پەژارەی قۊلیگ دیرم ئەرا کوچکردنی".

 بارزانی لە پۆستیگ لەبان سەکوو "ئێکس"، کە ئاژانس شەفەق نیوز وەدۊای کەفت، نۊسان: "ئەو پاشایگ رێزدار و دڵسووز بۊ، وە شکۆ و دانایی و خاکەڕاییەو خزمەت وڵاتەگەی کرد ئەرا زیاتر لە سێ دەیە".

 بارزانی هەمیش وت: "پرسە و سەرەخوەشی قۊل خوەم پیشکەش وە بنەماڵەی پاشایەتی و گەل نەرویج کەم لەی کووس گەورە".

 کۆشک پاشایەتی نەرویجی، لە وەختیگ وەرین لە ئمڕوو جمعە، خەوەر دا لە مردن پاشا هارالد پەنجەم لە تەمەن 89 ساڵی، دۊای شیویان رەوش تەندروسیی.

 کۆشک پاشایەتی لە بەیاننامەیگ وت: "وە پەژارەی فرەیگەو، خەوەر مردن خاوەنشکۆ پاشا هارالد ئمڕوو راگەیەنمین، پاشا هارالد وە ئارامی لە خەسەخانەی زانکۆی ئۆسلۆ ئمڕوو جمعە 28 ئاب/ ئۆگۆست سەعات 6:35 شەوەکی (وە وەخت نەرویج) گیان لەدەس دا".

مردن هارالد پەنجەم دۊای زیاتر لە 35 ساڵ تیەێد کە لەبان تەخت نەرویج وەسەر برد، کە لە 17 کانوون دۊەم/ یەنایەر 1991 دەسەڵات گرتە دەس، لەشوين باوگی پاشا ئۆلاڤ پەنجەم، و دەسەڵاتە دەستوورییەیل پاشا شمارەیگ لە ئەرکە فەرمییەیل لەخوەی گرێد، لەناویانیش سەرۆکایەتیکردن گردەوبوین ئەنجومەن دەوڵەت و سەرپەرشتیکردن وازکردن فەرمی ئەرا پەرلەمان نەرویج.

 هارالد، کە لە 21 شوبات/ فێبرایەر 1937 لەداڵگبۊە، وەتەمەنترین پاشایەیل ئەوروپا بۊ لە ساڵەیل دۊایی، هەمیش مەنە یەکیگ لە دیارترین کەسایەتییەیل جەماوەری لە نەرویج، وە گەرد کەمەوبۊن توانای لەبان جیوەجیکردن بڕیگ لە ئەرکە فەرمییەیلی وەگەرد چگنی وەناو تەمەنەو.