نێچیروان بارزانی پلانیگ شۆڕشگێڕانە ئەرا دووارە ناسانن گەل کورد و سیستەم خوەنەواری نشان دەێد

2023-01-23T10:54:20.000000Z

شەفەق نیوز/ نێچیروان بارزانی سەرۆک هەرێم کوردستان، ئامادەی ئاهەنگیگ بوی، ئاکادیمیای کوردی و زانکۆی سەڵاحەدین و پارێزگای هەولێر رێکی خستن، ئەرا رێزگردن لە تۆێژینەر کورد دکتۆر فریاد فازڵ عومەر.

بارزانی لە وتاریگ لەناو ئەو ئاهەنگە ک بڕیگ لە وەزیر و وەرپرس و ئاکادمیایی و رەشنهویرەیل هەرێم کوردستان ئامادەی بوین وت: خوەشهاڵم ک ئمڕوو ئامادە بووم لە ئاهەنگ رێزگردن لە یەکیگ لە زانا ناودیارەیل گەلمان، ک خزمەت مەزنیگ ئەرا زوان و ئەدەب و میژوو کورد پیشکەش کردگە، ریزگردن لە توانا و بەهرە و بەرهەمەیل هەرلە زانا و خاوەن داهێنانمان خوەی ریزگردن لە ناسنامە و میژوو گەلمانە، و وەفاداریە ئەرا گشت رەنجەیل و تەقەلایل نەوەیل نیشتمان وەفادارەیل ک خزمەت ئەرا گەل و نیشتمانیان لە هەر چینیگ پیشکەش کردنە و لە هەر شوینیگ بوینە.

 هەمیش وت: وەی بوونە، خوەشم تیەێد پیرووزبایی لە زانکۆی سەڵاحەدین بکەم ک دکتۆرای فەخری پیشکەش وە دکتۆر فریاد فازڵ عومەر لەبان خزمەتەیلی کرد، دکتۆر فریاد لە ناوە دیارەیلە ک خزمەت گەل و نیشتمانی ئەرا زیاتر لە نیم سەدە کرد، و وەردەوام بوی لە مقیەتیکردن و خزمەتکردن زوان و کەلتور و میژوو گەلمان وە شیعر و وتار و تۆێژینەوەی زانستی و ئاکادیمیایی و مامووستایی و ئەڵگەردان و پڕۆژەیل روشنهویری.

 بارزانی لە باوەت دکتۆر فریاد وتیش: لە وەختیگ هیمان خوەنەوار زانکۆ بوی، مقەیتیکردن زوان و کەلتور و میژوو کوردستان و خزمەتکردنی کردە ئامانج سەرکەی خوەی، و درویژە لە کاری لەی چینە دا، دویای تەواوکردن خوەنستن باڵا و وەدەسهاوردن دکتۆرا لە ئەڵمانیا، پەیمانگای تۆێژینەوەی کوردی لە زانکۆی ئازاد لە پەرلین دامەزران، ک خزمەت زوان و ئەدەب و میژوومان ئەرا زیاتر لە ٣٣ ساڵ کەێد.

وتیش: وەگەرد پیشکەشکردن ٤٤ کتاو ئەرا کتاوخانەی کوردی، دکتۆر فریاد هەمیش پیەڵ قایمیگ بوی ئەرا پەیوەندی، وە پیشکەشکردن هویر نەتەوەمان ئەرا جەهان دەیشت، وەتایبەت کۆمەڵگای خوەرئاوایی، ئەوەیش وەگەرد فەرهەنگ ئەکادیمیایی کوردی وە زوان کوردی و شیوەزار سۆرانی، و فەرهەنگ کوردی ئەڵمانی و ریسگایل کوردی وەزوان ئەڵمانی و بڕیگ کار زوانەوانی گرنگ، هەمیش ئەڵگەردان ئەنتیکەی ئەحمەد خانی، مام و زێن، و دیوان نالی، و شعر گۆڕان، و شعر شێخ نوری شێخ ساڵح ئەرا زوان ئەڵمانی و ئینگلیزی، و ناسانن شیوەی راسی گەل کورد لە هویرمان و ویژدان گەلەیل جەهان جویر کەلیگ خاوەن زوانیگ ژنی و ئەدەب باڵا و کەلتور دەوڵەمەن وە ئەرزش رەنگینی و مرۆیی.

وتیش: وینەی کورد و گەل کورد جاران لەڕی سەردانکەرەیل بیگانە و زانایلمان رەسیادە ئەو دەوڵەتەیل، و لە ئەوپەڕ خاسەگەی وینەی جەنگاوەر ئازایگ وەپیمان دان، وینەیگ تەواو نەکریاگ ئەرا ناسنامە و میژوو ئیمە، ئەراوە، گرنگە ئەو وینەی جارانیە بسڕیەێدەو، تا بتوەنن وینەی راسمان بوینن، وە رەسانن هویر و ئەدەب و کەلتورمان.

بایەتە جەهان دەیشت هویر کورد بوینێد و بخوەنێد، و ئەوە ئەرک زانایل گەلمان و ئەکادیمیایی و رەوشنهویرەیلە، گرنگە ئەرا ئی ئەرکە دامودەزگایل گورجیگ بوود، لە کەسەیلیگ شایستەدار و وەتوانا و خاوەن ئەزموون چ لە ناو یا دەیشت دروس بوود.

لە چینیگتر، سەرۆک هەرێم کوردستان وت: ئیمە ئمڕوو هایمنە سەردەمیگ ک هویچ چەک قایمیگ جویر زانست و دانایی نیە ئەرا مانا و مقیەتیکردن و هیزمان، مانای هەر دەوڵەتیگ لە جەهان و پیشکەفتتی لە ئاست بەرهەم و توانای داهێنان نەوەیلیە لە گشت چینەیل، سیاسی و ئابووری و کۆمەڵایەتی و کەلتوری وە شیوەیل زانستی و نوو، ئەراوە، زانا و خاوەن داهێنان و بەهرەدارەیل بنمایەی گرنگن ئەرا نەتەوە و وڵاتمان.

سەرۆک هەرێم کوردستان وتیش: زوان خوەی قەڵغان سەرەکیە ئەرا ناسنامەی نەتەوەیل، و بایەتە لەی نووڕینە تەماشای بکەیمن ک خاوەن ئەرزشیگ گرنگە، نەبایەت  خوەنەواری تەنیا ئەرا وەدەسهاوردن خاڵ و پلە بوود، وەلێ هەمیش بایەتە ئەرا رەسین وە دانایی و زانست و وەخاتر پیشکەفتن گەڵ و گەشەکردنی بوود.

Shafaq Live
Shafaq Live