حزبەیل کوردستان ئیران خوازن سوود له یاد ٧٧ ساڵەی دامەزریان کۆمار کوردستان بگرن

2023-01-22T08:41:03.000000Z

شەفەق نیوز/ ناوەند ھاوکاری حزبەیل خوەرھەڵات کوردستان لە یاد ٧٧ ساڵەی دامەزریان کۆمار کوردستان ئویشێد: قایمکردن گیان یەکگردن و وەیەکەوبوینیان ئاسانتر گەل کورد وە مافەیل خوەی رەسێد.

ئمڕوو ٧٧ ساڵ  لە دامەزریان کۆمار کوردستان وەلایەن پێشەوا قازی محەمەد لە شار مھاباد خوەرهوڵات کوردستان رەد بوود، وەو بوونە، ناوەند ھاوکاری حزبەیل خوەرھەڵات راگەیانیگ بڵاوکردیە ئاماژە وەوە کردیە؛ ئمساڵ لە وەختیگ یاد ٢ ڕێبەندان کەنەو زیاتر لە ٤ مانگە شۆڕش “ژن، ژیان، ئازادی” ک چەخماخەگەی لە کوردستان لەلی دریا و سەرتاسەر ئیران گردیەسەو و حزبەیل خوەرھەڵات زیاتر لەھەر وەختیگ ئامادەیی خوەیان ئەرا ھاوکاری و ھاوئاھەنگی وەرد یەکتر بڕیە.

وتیش؛ لە دویای ٧٧ ساڵ لە دامەزریان یەکەم کۆمار کوردی ئیسە کوردستان جاریگتر  و فرە جەماوەرییتر لە سەردەم کۆمار ھاتیەسە مەیدان و ئەرا مافە رەوایل خوەی خەبات کەێد. 

ناوەند ھاوکاری حزبەیل خوەرھەڵات لەو باوەڕەس وەهیزکردن گیان یەکگرتگی و وەیەکەوبوین و وەهیزکردن و زویتر کردن پرۆسەی ھاوکاری و پرۆژە و پلان ھاوبەشی حزبەیل خوەرھەڵات کوردستان، ئاسانتر گەل کورد وە مافەیل خوەی رەسێد ، ئەوەیش ھەمان ئەو ئامانجیلەن ک کۆمار کوردستان لە ماوەی تەمەنی کوڵی  کار ئەرای کرد.

Shafaq Live
Shafaq Live