لە 72 تا 39 ترلیۆن دینار.. داوەزینیگ تۊن لە داهاتەیل عراق لە ماوەی 7 مانگ
شەفەق نیوز- بەغداد
سەرۆک دەسەی گشتی ئەرا چەودیاریکردن تەرخانکردن داهاتە فیدراڵییەیل، سوزان عەبدوڵڵا محمد، رووژ چوارشەممە، ئاشکرا کرد لە داوەزین داهاتە نەفتییەیل عراقی وە رێژەی 53% لە ماوەی هەفت مانگ یەکەم لە ساڵ 2026، لە بەراورد وە هەمان ماوە لە ساڵ گوزەشتە، لە وەختیگ داهاتە نانەفتییەیل وە رێژەی 23.5% بەرزەو بۊن.
محمد ئەرا ئاژانس شەفەق نیوز وت، کە داتایەیل هەژمار دەوڵەت فیدراڵی کە لە وەزارەت دارایی - فەرمانگەی ژمێریارییەو دەرچگنە، تا کۆتایی تەمموز 2026، نیشان دان لە داوەزین سەرجەم داهاتە گشتییەیل لە نزیکەی 72 ترلیۆن دینار لە ماوەی هاوشیوە لە ساڵ 2025 وەرەو 39.1 ترلیۆن دینار، وە داوەزینیگ کە نزیکەی 45.7% بوود.
دیاری کرد کە داهاتە نەفتییەیل لە نزیکەی 65 ترلیۆن دینار لە هەفت مانگ یەکەم لە ساڵ گوزەشتە داوەزین وەرەو 30.4 ترلیۆن دینار لە هەمان ماوەی ئی ساڵە، ئەو کارە کە قەوارەی کاریگەربۊین سەرچەوە داراییە فیدراڵییەیل وە داوەزین داهاتە نەفتییەیل نیشان دەێد.
لە وەرانوەریش، داهاتە نانەفتییەیل بەرزەوبۊنیگ وە رێژەی 23.5% تومار کردن، تا بڕەسنە نزیکەی 8.7 ترلیۆن دینار، لە بەراورد وە نزیکەی 7.1 ترلیۆن دینار لە هەمان ماوە لە ساڵ 2025، وەپەی ئەوەگ محمد وتەی.
محمد وتیش کە بەش داهاتە نەفتییەیل لە سەرجەم داهاتە گشتییەیل لە نزیکەی 90% ئەرا 78% داوەزی، لە وەرانوەر بەرزەوبۊن بەشداری رێژەیی ئەرا داهاتە نانەفتییەیل، وەلی دووپات کرد کە ئی زیایبۊنە هێمان بەس نییە ئەرا قەرەبووکردن ئەو داوەزینە گەورا لە داهاتە نەفتییەیل.
سەرۆک دەسەگە دووپات کرد لەبان ئەوەگ کە زیاترکردن داهاتە نانەفتییەیل دی وژاردەیگ دارایی نییە، بەڵکم بۊەسە خوازیاییگ ستراتیژی ئەرا وەهیزکردن وەردەوامی دارایی و کەمەوکردن پشتبەسین وە نەفت، لەڕی وەرەونواچگن سیستەمەیل وەرگردن و کوەکردنەو (باج)، و وەهیزکردن شەفافیەت و چاودیاریکردن لەبان سەرچەوە فیدراڵییەیل.
عراق رویوەڕوی گرفتەیل دارایی زیایبۊیگ بوودەو لە ئەنجام بەسانن تەنگەی هورمز وە مدوو جەنگەگە، چۊنکە رێڕەو سەرەکی ئەرا هەناردە نەفتییەیل هەژمار کریەێد، لە وەختیگ کە ئابووری عراقی وە شیوەیگ گەورا پشت وە داهاتەیل نەفت بەسێد جویر سەرچەوەیگ بنەڕەتی ئەرا داهاتە گشتییەیل و پۊلدارکردن بودجە.
و لە وەختیگ زویتر لە هەفتەی گوزەشتە، راپۆرتیگ کە لە سندووق کاش ناودەوڵەتییەو دەرچگ نیشان دا، کە عراق یەکیگ بوود لەو ئابوورییەیلە کە فرەترین کاریگەری وە شڵەژانە هەرێمییەیل لە ماوەی ساڵ 2026 وەردەگرن، وەگەرد رەنگداینەوەی ئاشکرا لەبان رێژەیل هەڵاوسان و هەژمارە دەرەکییەیل و دارایی گشتی.
