لافاو ویرانکەر نیپاڵ.. کوشیاگەیل زیاتر لە 600 و 2000 بیسەروشوین
شەفەق نیوز- وەدۊاچگن
لافاوەیل تونیگ لە نیپاڵ بۊنە مدوو کوشیان زیاتر لە 600 کەس لە نیپاڵ و ناوچەی تبت لە چین، و هێمان زیاتر لە 2000 کەس وە بیسەروشوین هەژمار کریەین.
شیشیر خانال وەزیر دەیشت نیپاڵ، وەپای رۆیتەرز وت، کە وڵاتەگەی هەوەجە وە دەسمیەتی بیگانە دیرێد لە بوارە پسپۆڕ و تەکنیکییەیل کە شارەزایی لەلییان دیرێد، لە دۊای لافاوە ویرانکەرەگا، وەلی هەوەجە وە دەسمیەتی لە پرۆسەیل مینەکردن و رزگارکردن نەیرێد.
لافاوەیلە دانە بان ناوچە نزیکەیل لە سنوورەیل چینییەو، ئەوەگ بۊە مدوو ویرانکردن شارەیل وە تەواوی و رەسانن زەرەدەیل وە وێستگەیل بەرهەمهاوردن وزەی کارۆئاوی.
رووژنامەی کاتماندۆ پۆست خەوەردا کە هیند و چین و ویلایەتە یەکگرتگەیل و بەریتانیا و ژاپۆن و کۆریای باشوور و سریلانکا و بەنگلادیش داوا لە حکومەت کردنە ری وە تیمەیل مینەکردن و رزگارکردن خوەیان بیەێد دەسمیەتی لە پرۆسەگە بیەن.
خانال وت کە نیپاڵ هەوەجە وە دەسمیەتی بیگانە دیرێد لە بوارەیلیگ چۊ رزگارکردن ئەو کەسەیلە کە لەناو تونیلەیل گیر خواردنە و وازکردن خزمەتگوزارییەیل گواستنەوە و پەیوەندیکردن لەو شوینەیلە کە پیەڵەیل لەناویان ویران بۊنە و ناسین تەرم کوشیاگەیل و ئەنجامداین وەشکینەیل ترش ناوکی و هەڵگردن تەرمەیل ئەرا ماوەیل دریژتر.
دۊکە جمعە وت "ئیمە وە راسی داواکارییەیل پیشکەش کردیمنە ئەرا وەدەسهاوردن ئیجۊر خزمەتگوزارییە پسپۆڕ و دەسمیەتیەیل تەکنیکی لەو بوارەیلە کە شارەزایی و زانست تەکنیکی بەس لەناویان نیریمن".
نیپاڵ داوا لە هەردوگ هاوسای خوەی هیند و چین کرد پیەڵەیل ئامادەی هامشوو دابین بکەن ئەرا وازکردن ریەیل گواستنەوە و پەیوەندیکردن لە وەختیگ زۊتر لەو ناوچە کە تۊش کارەساتەگە هاتیە کە نزیکەی بیس پیەڵ لەناوی رمیاس.
وەزارەت دەیشت نیپاڵی لە وەختیگ گوزەشتە لە دۊکە جمعە، راگەیانۊد کە کاتماندۆ لەی وەخت ئیسە تۊەنێد وە تەنیا تەقەلایەیل رزگارکردن وەڕیەو بوەێد، و دەسوردان بیگانە رەت کرد.
لە جواو پرسیاریگ لەباوەت هەڵوێست حکومەتەگەی، خانال وت کە هیچ هەوەجەیگ وە دەسمیەتی لە پرۆسەیل مینەکردن و رزگارکردن گشتی نەیرێد کە پیاوەیل رزگارکەر نیپاڵی جیوەجیی کەن، و زیاتر وت "باوەڕ دیرم کە هیچ هەوەجەیگ وە دووارەکردن ئەوە نییە".
وەرپرسەیل رزگارکردن لە نیپاڵ وتن کە فرەیگ لە تەرمەیل ئاوەگە بردیەسەیان و لە چیتوان و ناوالپاراسی لە دەشتەیل، لە دویری نزیکەی 100 کیلۆمەتر لە شوین کارەساتەگە دراوریانە.
هەمیش وتن کە لافاوەیل بۊنەسە مدوو زەرەدەیل گەورەیگ ئەرا بینای مەکتەوەیل و خەسەخانەیل و وێستگەیل بەرهەمهاوردن وزەی کارۆئاوی و ریەیل و پیەڵەیل و لە ژیرخان.
وتیش کە نیپاڵ هەوەجە وە پاڵپشتی بیگانە دیرێد لە کارەیل ئاوەدانکردن و نووەوکردن لە بانان.
خانال وت کە راپۆرتەیلیگ هەس نشان دەن کە بڕیگ کەس شایەت لەناو تونێلەیل وێستگەیل بەرهەمهاوردن وزەی کارۆئاوی گیر خواردۊن.
هەمیش وت کە نیپاڵ شارەزایی گەورەیگ لە بوار تونێلەیل نەیرێد و هەوەجە وە کەلوپەل و زانست تەکنیکی لە پرۆسەیل رزگارکردن لەناو تونێلەیل دیرێد.
