خانمە وەرپرسیگ ئەمریکی: فڕۆکەیل بێفڕۆکەوان نوینەرەیل ئیران لە عراق و خوەرهەڵات ناوڕاس سەرچەوەیان چینە
شەفەق نیوز/ خانمە شاگرد وەزیر دەرەوەی ئەمریکا ئەرا باوەتەیل خوەرهەڵات ناوڕاس، باربرا لیف، ئمڕوو یەکشەممە، ئاشکرا کرد ک ئەو فڕۆکەیل بێفڕۆکەوانە ک میلیشیایل سەروە ئیران لە عراق و ناوچەیل جیاجیا لە خوەرهەڵات ناوڕاس وەکاریان تیارن، سەرچەوەیان وڵاتە چینە.
سایت "ئێران ئەنتەرنەشیناڵ" لە خەوەریگ ئاژانس شەفەق نیوز ئەڵگەردانی کرد وت: لیف لەوەردەم دەسەی پەیوەندیەیل دەیشتەکی لە ئەنجومەن پیرەیل ئەمریکا وتیە: وڵات چیب پاڵپشتی فرووشتن فڕۆکەیل سەربازی بێفڕۆکەوان ئەرا دەوڵەتەیل عەرەبی کەێد، و لە خود وەختەگە هویچ تەقەلایگ ئەرا وسانژ هاتن فڕۆکەیل ئەرا میلیشیایل سەروە ئیران لە ناوچەگە نیەێد.
راپۆرت ئەو سایتە ک لە ئۆپۆزسیۆن ئیرانی نزیکە، لە زوان خانمە وەرپرسەگە وت: یە چشت ئەڵاجەوییگە، ومن یە ئیوشم، ئی فڕۆکەیل بێفڕۆکەوانە ک ئی نوینەرەیل سەروە ئیرانە وەکاری تیارن، لە بنچینەیان وڵات چینە.
وتیش: ئی فڕۆکەیلە لەلایەن دەوڵەت چین پیشکەش نیەکریەن، باوجی (دەوڵەت چین) تەقلای نواگردنی نیەێد.
راپۆرتەگە وتیش: تەهران ئی فڕۆکەیل بێفڕۆکەوانە لە وڵات چین کەفنە دەسی، و بەشیان کەێدە بان ئەو گرووپەیلە ک لەجیای ئیران کار کەن، لە جویراجویر شوینەیل ناوچەگە.
باربرا لیف وتیش: وڵات چین لە خود وەختەگە، وە راستەخۆ فڕۆکەیل بێفڕۆکەوانی فرووشێدە حکومەتەیل ئی دەوڵەتەیل ناوچەگە.
