وێنە.. جەژن بیخوەشییگ تر ئەرا یەتیمەیل مووسڵ
شەفەق نیوز/ تەنیا چەن رووژیگ تر ئەرا جەژن رەمەزان مەنیە، و هەرچەن گەشوهەوایل جەژنەیل جارانی لەوەر مقەیەتیکردن لە ڤایڕۆس کۆرۆنا نەمەنیە، باوجی هەر جوور دەرفەتیگە ئەرا جووڵکردن ئەو خەفەتەیلە ک لەبان عراقیەیل کەڵەکە بوینە، وەلی چەن شاریگ و چەن چینیگ لەناو مەردمەگە هەس ک ئەو جەژنە لەلایان لە جیای خوەشی بویەسە زەخمیگ لەلیان.
شار مووسڵ وە رمیاگییگ ک سیماگەی خراو کردگە، چوودە پیری جەژن رەمەزان، وەگەرد دڵتەنگی هەازان یەتیمەیل ک تا ئیسە وەبی خاوەن وبی بەرنامەیگ حکومەتی مەننە ک ژیان گونجیاگیگ ئەرایان پەیا بکەێد.
لەناو هۆڵ بویچگیگ لە شار مووسڵ کۆن، ٥٠٠ مناڵ یەتیم گردەو بوینە، وە مکیسیگ لەلایەن تیمیگ خوەیبەخش، ئەرک پرتاڵ جەژن ئەرا ئی مناڵەیلە خوەیان و داڵگەیلیان گردیەسە خوەی، لە هەڵمەتیگ ئەرا سووکەوکردن ژان یەتیمی لەلیان، وەگورەی قسەیل ئەیوب زەنون ک یەکیگە لە کەسەیل ئی هەڵمەتە، ئەرا ئاژانس شەفەق نیوز.
داڵگ ئەحمەد، داڵگ چوار یەتیمە، ریخراو داعش وەرجە شەش ساڵ باوگیان کوشت، ئەرا ئاژانس شەفەق نیوز ئویشێد: یە هەفت ساڵە ئی مناڵەیلە باوگیان لەدەسیان چگە، باوجی تا ئمڕوو فرەیان هیچ مافیگ لە حکومەت عراق نەکفتیەسە دەسیان.
یەکیگ لە وەرپرسەیل تیم خوەیبەشەگە، مویەسەر شێخاوی، ئەرا ئاژانس شەفەق نیوز وت: مووسڵ پڕە لە هەزاران یەتیمەیل. ەهیچ ئاماریگ فەرمی ئەرا شمارەیلیان نییە، و فرەیش لە وجاخ بیسەروشوینەیل هەس ک فەرە سەختە ئەرا خاوەنەیلیان وەیزویە ماڤیگ ئەرایان وەربگرن، ئەوەیش لەوەر ریکارەیل حکومەت عراق.
وتیش: ئیمە لەیرا ئەرک ٥٠٠ یەتیم لە مووسڵ کۆنە هەڵگریمن، باوجی ئەو یەتیمەیل لەو ناوچەیل عراق حاڵیان چە بوود.
شێخاوی پرسیار کرد : بنووڕە بەشیگ لەو مناڵەیلە ک دڵنگ سەربازی کەنە وەریان، ئەوانە فەرزەن سەرباز و ئەفسەرەیلیگن ک گیان خوەیان پێشکەش وەی وڵاتە کردن ئایا ئەیە سزای خاسیە وەی جوورە حکومەت بخەیدەیانە پشتگووش؟.
لە کۆتایی قسەیلی ئویشێد: ئەوەگ وەدەسمان تیەێد ئەرا خاسەیل خەڵک ئی شارە پێشکەش کەیمن، و فرە خوازیمن تا ئی زەخمەیلە تیمار بکەیمن.
