هشکەساڵی لە یەکیگ لە دیارترین گوڵەمەیل (ئەهوار) عراق گامیش لەناودەێد
شەفەق نيوز- ميسان
مورتەزا جەنوبی چالاکوان ژینگەیی، ئمڕوو دووشەممە، هوشداری دا لە کارەساتیگ ژینگەیی ت مرۆیی دەێد لە گوڵەمە ئاوەیل (ئەهوار) حوێزە، دویای ئەوە کە زیاتر لە 15 ئاوای و چەم سەرەکی کەفتنە وەر هشکەساڵی، کە بویە مدوو فەوتیان فرەیگ لە گامیشەیل.
جەنوبی ئەرا ئاژانس شەفەق نیوز وت: زیاتر لە 15 ئاوای لە کەنار هۆر حوێزە یە مانگ و نیمیگە وەتەواوی هشکەو بوینە، وەگەرد هشکەوبوین سێ چەم سەرەکی کە لە چەم کەحلاوە تیەن، تووس و عسیچی و زوبێر، بیجگە هشکەساڵی لە چەم مشەرەح لەلای عوێنیەو، کە ئەویش ئاو ئەرا ئەو هۆرە کلکردیاد.
وتیش: ئاو وەتەواوی نییە، ئاو نووشینیش ئەرا مەردم نەمەنیە، و رووژانە گامیشەیل لەوەر نەوین سەرچەوەیل ئاو مردارەو بوون، کە ئی ئاژەڵە لەناو ژینگەی نەی و ئاو ژیەێد.
جەنوبی وتیش: ما گامیشیگ ئاووس دیم کەفتە ناو چاڵیگ خەرگ، و هەگ کەفتە ناو چاڵەگە بەچکەگەی لەباری چگ و مردارەو بوی، و ئی چاڵەیلە لەناو مەردم وە بکوشەیل لەو ناوچەیل هشکە ناسیاتە.
وتیش؛ وەزارەت کشتوکاڵی ئاماریگ راسگانی نەیرێد لە شمارەی گامیشە فەوتیایەیل، هەرچەن گشت دانیشتگەیل ئەهوار ئی ئاژەڵە دیرن جویر سەرچەوەیگ ئەرا ژیان، وەلێ هشکەساڵی هیلێد مەردم تاوانا نەیاشتوون ئاو ئەرا خوەیان پەیا بکەن، ئەراوە گامیش خریا پشتگووش، دووپاتیش کرد کە خەڵکەگە چەن وسیانیگ ناڕەزایی ئەرا داواکردن گلەوداین ئاو ئەرا چەم و هۆرەیل ئەنجام دان، وەلێ بیخود.
وتیش: جاران ئاوەگە لە میسان/ کەحلا بوی، ئەرا بەسرە کلکریا، کە نزیکەی 90 مەتر سێجا لە چرکەیگ بەێد، و ئمڕوو کەحلا هیچ تاقەبەشیگ لە ئاوەگە نەیرێد، هەرچەن بایەس بوی 18 مەتر سێجا لە چرکەیگ وەربگرێد.
وتیش: ئی قەیرانە یە چوار ساڵە دووارەو بوود، وەلێ ئمساڵ رەسیە لوتکە، کە کارەساتەگە تەنیا لە هشکەساڵی (ئەهوار) نەوسیا، وەلێ رەسیە چەمەیلیش.
