کەمینەیلە لە عراق: بۊمنەسە نێچیریگ ئەرا فراکسیۆنە گەپەیلە
شەفەق نيوز/ کەمینەیلە لە عراق داد لە پشتگووشخستن و دۊرەوخستن لەلایەن فراکسیۆنە گەپەیلە کەن، لە مەوقەی دروسکردن حکومەت عراق و بەشەوکردن کابینەیل وەزارەتی و پۆستەیلە، لەو مەوقە ک نوقڵانەی گردەوبۊن جەماوەری ئەرا وەدەسهاوردن مافەیلیان دەن.
تەنیا چەن رووژیگ مەنیەسە مەوقەی هەڵبژاردن پەرلەمانی وەرجەوەخت لەناو چەودیریکردن لەلایەن کەمینەیلە ک شایەت لە ئەنجامەیل هەڵبژاردنەگە پەرلەمان و حکومەتییگ دەرچوود ک بەشیگ زیاتر لە وەڕیەوبرەن وڵاتەگە بیەن.
نبراس ئەبو سۆدە خانمە یاوەر قسەکەر وەناو کۆمسیۆن باڵای هەڵبژاردن باس شیوەی دابەشکردن شمارەی کورسیەیل پەرلەمان لەناونی کەمینەیلە لە عراق، ئەرا ئاژانس شەفەق نیوز دیاری کەێد.
ئۊشێد: وەرز چوارەم پەنج کورسی لە بەغداد و نەینەوا و کەرکوک داگە پێکاتەی مەسیحی، و یەک کورسی ئەرا سابیئی لە پارێزگای نەینەوا، و یەکیگیش ئەرا شەبەکی لە نەینەوا، و یەک کورسی ئەرا کورد فەیلی لە پارێزگای واسیت.
*کورد فەیلی
لەی باوەتە، په‌رلمانتار مازن ععەبدولمنعم فەیلی لە پارێزگای واسیت ئەرا ئاژانس شەفەق نیوز ئۊشێد: کوردەیل فەیلی لە پارێزگایه‌ل عراق و واسیت وە سێ مەلیۆن مەزەنە کریەن، و تەرخانکردن تەنیا کورسییگ ئەرایان لە واسیت ستەمە لەبانیان، و بایەتە لە بەغداد یەک کورسی و دیالە یەک کورسی بیاشتان.
و دیاری کرد ک کوردەیل فەیلی قوربانیەیلیگ نەتەوەیی ومەزهەبی لە سەردەم ڕژیم وەرین پێشکەش کردنە ومافەیل خوەیان وە بەراوردی قوربانیەیل کورد وەرنەگردنە.
*مەسیحیەکان
لەلای خوەییش، ئیعتیماد ئاغا کاندید پێکهاتەی مەسیحی لە پارێزگای نەینەوا ئەرا ئاژانس شەفەق نیوز ئۊشێد: ئی ئەزموونە لەساڵ ٢٠١٨ وەخوەم دیم، و هۊیچ پاپایگ یا پشتگیرییگ لەلای هۊیچ لایەنیگ نەیم، وتیش: دەرفەت پێکهاتەی مەسیحی کەمە، و کەمەوکردن ئەرا ئی پێکهاتە هەس، ک هیشتەم خوەم کاندید بکەم، وەلێ لە راسیەگە شۆک بۊیم، و هۊیچ دەرفەتیگ ڕاسی ئەرا پێکهاتەی مەسیحی ئەرا پۆستەیل باڵا نییە.
وتیش: توانای فرە بەرزیگ لەناو مەسیحیەیلە هەس، ک ناسریانە وە دەسپاکی و توانای رانین وڵاتەگە وەگشت شایستەیگ دیرن، وەلێ وەداخەو ک یە شایستەی مەسیحیە لە وڵات ئاشوور باپیران.
*شەبەک
لەلای خوەییش، قوسەی شەبەکی نۆێنەر شەبەک ئەرا ئاژانس شەفەق نیوز وت: کەمینەیلە هەر جۊر نێچیریگ لەناوبەین فراکسیۆنە گەپەیلە مینن، ک وەگورەی بۆچوون بندەسەکردن و کوڵبڕی و دووچەوەکی ڕەفتار کەن. _ و دیاری کرد ک لەو ماوەیلەگ لە پەرلەمان بۊیمن کار لەبان یاسای ئەیزیدیەیلە و قەرەبووکردنەوەی کەمینەیلە کردیمن، و باس داد خوەی لە کەمی نۆێنەرایەتی شەبەک و ئەیزیدیەیلە و پشتگووشخستنیان لە باڵیۆزخانەیل عراقی کرد، ک لەوەر بەشبەشەکی هۊیچ پۆستیگ نەیرن.
شەبەکی وتیش؛ بایەتە کەمینەیلە دەور گرنگیگ لە دەستوور عراقی بیاشتان باوجی وە پشتگووش خریان، و دووپات کرد ک ئیمە لە داواکردن وەردەوامیمن، و ئەگەر حکومەت جیوەجی نەکرد ئەوەسا هان جەماوەرەیلە دەیمن ئەرا داواکردن وە مافەیلمان وەگورەی دەستوور عراقی.
