کوردستان 3 تەواوکەر خوەراکی لە بازاڕەیل کیشێدەو وە مدوو ماددەیگ "رخدار"
شەفەق نیوز- هەولێر
وەڕێوەبەرایەتی کۆنترۆڵ جویری دەرمان لە هەرێم کوردستان، ئمڕوو یەکشەممە، کیشانەوەی سێ بەرهەم لە ناو تەواوکەرە خوەراکییەیل راگەیان لە بازاڕ دەرمان لە هەرێم کوردستان، لە دویای ئەوەگ وشکنینە تاقیگەییەیل دەرخسن ماددەی دەرمانی قەیەغەکریاگ "سیبوترامین" لە لەناویان هەس بی ئەوەگ لە بەڵگەنامەیل بەرهەمەیل دیاریبکریەێد وەپی بکریەێد.
وەڕێوەبەرایەتیەگە لە بەیاننامەیگ رەسیدە ئاژانس شەفەق نیوز وت: بڕیارەگە ئەرا پاراستن سەلامەتی هاووڵاتییەیل و پارێزگاریکردن لە تەندروسی گشتی دەرچگە، و ئاشکرا کرد راپۆرت وشکنین تاقیگەیی دەرچگە وە لایەن خوەیەو هەبوین "ماددەیگ دەرمانی شاریاگ رخدار و قەیەغەکریاگ" لە ئی بەرهەمەیلە ئاشکرا کردگە.
وەپای بەیاننامەگە، ئەو بەرهەمەیلە بڕیارەگە گرێدەیانەو بریتین لە: قاوەی رۆما (ROMA Coffee)، و قاوەی میلانۆ (Milano Coffee)، و چای جینسینگ (Ginseng tea). کە بانگەشە ئەرا کریەێد وەشیوەی بەرهەمەیل ئەرا لاوازکردن و داوەزانن کێش.
وەڕێوەبەرایەتیەگە ئاشکرا کرد وشکنینەیل چەسپاننە هەر سێ بەرهەمەگە بڕیگ فرە لە ماددەی سیبوترامین لە ناویان هەس، و دیاری کرد کۆمپانیای دروسکەر و کۆمپانیای هاوردەکەر لە بەڵگەنامە تایبەتەیل خوەیان دیاری وە هەبوینی نەکردنە.
لەباوەت وە ماددە ناوبریاگە، وەڕێوەبەرایەتیەگە خەوەر دا قەیەغەکریاگە وە مدوو ئەو رخدارییانە کە لەبان دڵ و کۆئەندام سووڕان خوین لای وەکارهاوەرەیل دروس کەێد، و لە ساڵ 2010ەو لە بازاڕەیل دەرمان لە وڵاتەیل جیاجیا کیشریاسەو.
وەڕێوەبەرایەتیەگە داوا لە هاووڵاتییەیل کرد واز لە سەنین و وەکارهاوردن ئی بەرهەمەیلە بارن، هەمیش داوا لە دەرمانخانەیل و ئەمبارەیل دەرمان کرد دەسوەجی ئۆپەراسیۆنەیل فرووشتن و سەنینیان بووسنن، و هوشداری دا سەرپێچیکارەیل رۊوەڕۊ سزایەیل یاسایی بوونەو.
