ئیلام فەیلی پشت وە کتاویگ و "شازادەی بویچگ" بەسێد ئەرا نواگیریکردن مەرگ

شەفەق نيوز/ لە پارێزگایگ ئەرا ساڵەیلیگ لەناو ریژەیل خوەیکوشتن بەرز و تونوتیژی خیزانی دڵتەزن تمیاوێد، چیرووک نوویگ وە بیدەنگ دروس بوی، لە سویک کتاوخانەیگ بویچگ، خاوەنی کابرایگە وەناو عەلی یەعقوبی، کە یە چیرووک گەلیگە مینەی قورتار کەێد، نەک وە تلیاک و نەیش وە وایین، بەڵکو وە کتاو.

تەنیا  وەرجە چەن هەفتەیگ، پولیس ئیلام فەیلی تاوانیگ دڵتەزن راگەیان؛ باوگیگ ژن و دوو مناڵ خوەی کوشێد، دویای ئەوە خوەییش کوشێد، رویداویگ کە لەی پارێزگا ناوازە نییە، کە ساڵانە زیاتر لە هەزار تەقەلای خوەیکوشتن لەناوی توومار کریەێد، 85%یان گەنجە تەمەنیان ناوەین 15 و34 ساڵە.

وەلێ لەناو ئی شار پڕ لە زەخمە، تویەم وەرخودانیگ رووشنهویری دەسکردە وەدیهاتن، کە رویکردن وەرەو کتاو لە ئیلام زیایبوینیگ چەوەڕینەکریای وەخوەی دوینێد، تا رەسیە ئەوە کە کتاوخانەیل ئەورا بوینە خاوەن زیاترین فرووشتن لە ئاست ئیران لەناو پێشانگایەیل وەرزی، هەمیش لەبان پلاتفۆرمەیل ئەلیکترۆنی.

یەکیگ لە دیارترین ئەوانە، یەعقوبی، خاوەن کتاوخانەی "شازادە بویچگ"، کە تەنیا کتاو نیەفرووشێد، بەڵکم کاریگ نائاشکرا کەێد، تیمارکردن زەخمەیل مەردم، کە ئویشێد: مینەی کتاوەیلیگ کردیام کە تویڕەیی بڕانێد، و پەیوەندی وەرد گۆڤارەیل و نویسەرەیل و ئەڵگەردانەیل کردم، و هەناێ بەشیگیان پەیا کردم، نمایشیان کردم، و لە ئەنجامی، هاتن و سەنین بیوینەیگ.

  ئیلام، کە رووژیگ لەناو دابڕیان و هەڵپووقیان بیدنگ بوی، کەمکەم بویە بازاڕیگ ئەرا کتاوەیل دەروینی و کۆمەڵایەتی و هویرکردەنی، وە هەڵمەتەیل تاکانە کە نشان تینگی مەردم دەێد ئەرا فامستن خوەیان و جیهانیان وەقسەی یەعقوبی، کە کتاوخانەگەی یەکەم بوی لە بڕ فرووشتن لەناو پێشانگای کتاو.

  هەرچەن نرخ کتاو گرانە، کتاوخانەیل ناوخوەیی رەنج دان تا لەلی کەمەو بکەن، وە پشتگیریکردن وەزارەت رووشنهویری یا لە گیرفان خوەیان.

 کتاویگ وە نرخ 3 ملیۆن تومان وە کەمتر لە دوو ملیۆن تومان پیشکەشی کردیمن، وەقسەی یەعقوبی، کە ئویشێدیش ئی کارە هیشت مەردم بان بسینن، و دەر لەڕوی گفتوگۆ نوویگ واز کرد لەبان وەرپرسایەتی دەوڵەت لە پلەی هەڵمەتەیل رووشنهویری.

وەلێ راسیەگە هیمان ناسکە، کە ئیمە وە قسە کتاوەیل بڵاو کەیمن نەک وە پرۆپاگاندا، کە یەعقوبی وەداخەو ئویشێد کتاوخانەیل لە پارێزگا بویچگەیل توانای بەرهەمهاوردن لە پرۆپاگاندا یا هەڵمەت فراوان نەیرن.

وەگەرد پرۆپاگاندا ئەرا ئەو کتاوەیلە کە پەیوەندی وە تویڕەیی و تونوتیژی دیرن، کتاوخانەیل هەمیشە تویش (سووفایەتی بیخود) یا (فەلسەفەی تەمی) تیەن کە مەغز گەنجەیل پڕەو کردنە، کە تەقەلا دەیمن جیگریگ ئەرا هویرکردن پیشکەش بکەیمن، دووارە مەردم بارێدە هووش خوەیان، و چشتەیل یەکگردن وەپییان بەێد.

 ئی چیرووکە کە لە ئیلام دروس بویە تەنیا لەبان کتاو نییە، بەڵکم لەبان گلەوداین دەنگیگە کە لەناوڕاس بیدەنگی و خوین گومابوی، چماێ گشت پارێزگاگە وە زەخم وازی، دووارە دەسکرد وە خوەنستن خوەی.

ئاژانس فارس- هەڵگەردان ئاژانس شەفەق نیوز