فرە گەرمە.. هوونکی وەرد هوورەچڕەیلەو چگ
کەنعان موڕاد/ خانەقین، کە هەر تاوسانیگ ناوی کەفێدە ناوەیل، لە بەرزترین پلەی گەرمی، خاوەن چەم ئەڵوەنە، دۊلە ئیسە، جاران فرەی باخ و بووسان بوی، چواردەوری بەرزە، ئەراوە، تا بەرزی دە مەتر لەناوچەگە وا جویر خوەی مینێد، و دیر ئاڵشت بوود، ئەگەر گەرمیە یا سەردیە، یا هەرچەگ هەس، تا وەخت فرەیگ لەناوی گیر تیەێد.
رووژانە، وە کەنار چەم ئەڵوەنا رەد بووم، وەپا کەفمەو ری، هەمیشە وەشوینگەو رەد بووم کە سان لەبان زەوی بوود، تا وەزوی بکەفێدە قەپاڵم، چوینکە تا رەسمە بازاڕ، وەلای دە دوانزە سەگەو رەد بووم، سەگ وەرەلا و بیخاوەن، کەسیگ نیەزانێد کەی پەلامار دەن، کە هەر چوار پەنجیان وەیەکەو گەردن، مینەی خوەراک لە کەنار ئەڵوەن کەن.
نەک هەر لەوەر سەگەیل، فرە لە چەم ئەڵوەنا نزیک نیەکەفم، چوینکە یەی بوو فرە گەنگیگ لەورەو دەرچوود.
هەر ئەو بووە هیلێد ئەو سەگەیل وەرەلا هەمیشە لە کەنار ئەڵوەن بوون، دیارە کە گووشت گەنیایە.
باخەیل خانەقین، بوینە قوربانی وەدەس خاوەن خوەیان، کە دویای دەیان ساڵ لە ئاویاری وە ئاو، دیارە ئاو نمەک ئەرایان نەیرێد، ئەراوە، دانەی دەم ئاگرەو، تا پویلیگ زیاتر بچوودە گیرفانیان، و خوسەیگ زیاتر بچوودە دڵ مەردم.
خو دی باخ نەمەن، دی چە دیریمن؟
ئیرنگە خانەقین وە تەنیا ئەڵوەنەو مەنیە، یەیش ئەڵوەن، بویەسە جی فڕەداین گووشت گەنیای، کە نیەزانم هن خاوەن مامرەیلە، یا هن چەس، تەنیا ئەوە زانم کە بوو گەنیگ لەلیەو دەرچوود، و کنارەیلی پڕن لە سەگ بیخاوەن.
لەوە گەنتر، ئەو بوتڵ پلاستیکە، کە ئاو وەپی خوەن، ئیجا، لە کەنار ئەڵوەن جویر بەلەمیگ ووڵ، وەبان ئاوەگەو کەفێدە ری، خوەریش لەبانەو سویەری کەێد، تا هەر ژەهر بکەێدە ئەو ناوە.
خاسە کە ماسیگرەیل هەمیشە بوتڵ و قوتی و لاستیک لە جیای ماسی درارن.
ئمجا ئویشن، چ گەرمە!
راسە کە جەهان گشتی گەرمەو بویە، وەلێ خوەدەیش کاریگ مەکە گەرمی زیاترەو بکەێ، و هویرەو بکە گەرمی چە زیایەو کەێد، و چە کەمیەو کەێد؟.
هەر ماوەی جاریگ، چەن کەسیگ دڵسووز لە شار خانەقین هەن، خەم ژینگە هەڵگردنە، بڕیگ پویل دەن، بڕیگیش گردەو کەن، تا چەن داریگ دانەن، و دویای ساڵیگ، کەفنە هووڵ ئەوە کە چوین ئاویان بیەن.
تەنیا حکومەت ئەوە وەپی کریەێد، کە بایەسە پلانیگ داشتوود ئەرا پڕەوکردن شوین باخەیل جوانەمەرگمان، کە داخیان گرانە، کە شوینیان بویەسە جادەی سیا، و قیل سویەر، و محویلەی کارەبا، و بووڕە و دویکەڵ و ئاگر مولیدەیل کارەبا، کە لە جیای ئەو باخەیلە کە ژینگە هوونکەو کردیان، یانە هاتنەسە دی، گوایە تا مەردم لەناو ئەو ماڵەیلە داکاسیەن، کە ئەوسا باخ بوین، ئمجا، ئەگەر ژینگە بکوش بوود، ماڵ چە کەێد؟.
