تەکنەلۆژیا چە وەسەر زاڕوویەێلمان تیارێد ؟
فاتمە سەڵاح/ تەکنەلۆژیا ئەو داهێنانە نووەیلەیە ک وەزۊی بی شمارەیگ گشت زانست و زانیارییەل بڵاوە کەێد (مۆبایل ، تەلڤیزییۆن، لاپتۆپ ، ئایپاد ، پلستەێشن ...) ، وە یەکیگ لە هووکارەێل وەرەو نوا چگن کۆمەڵگا دانریەن ، باوجی کاریگەری خاس و گەن دێرید وەبان ژیان خوەمان و زاروویەێلمان ، هەر زارووێگ لەداڵگبوود دوو هووکار سەرەکی کار وەبان ڕەفتارەیلیان کەێد:
1ـ هووکارەێل دیروەختە: زاڕوو لە باوانەوە لە ڕێ بۆهێل (جینات) ئەرای وەجی ئەمیند.
2ـ هووکار ژینگەیی : ژینگەی دەورو وەر زارووەگە ئەگردەو جۊر ماڵ و کۊچە و ژینگەی کومەڵایەتی و تەکنەلۆژیا و مەکتەو...تادوایی ، هەریەک لەیانە وە شیوەیەگ کەم یا زیای و خاس یا گەن وەشیوەی تایوەتێگ کاریگەری کەنە بان رەفتار زارووێلمان، لە ڕووزگار ئمڕوومان ئیسفاکەیم تەکنەڵۆژیا کاریگەری گەپێگ لەبان جوولە و قسە و دانشتن و نووڕین وخەنستن... زاروویەێلمان وەجی هشتگە ، ڕووژانە لەلیان وەدی ئەکەێمن.
ئی ئامێرەێلە ئەگەر وەشیوەی خاس و دروس وەکاریان بارین سەرچەوەی خاسێگن ئەرا چاشیین و گەشە سەنین مەغز ، باوجی وەکارهاوردنیان وەشیوەیەگی نادروس کارەسات گەپێگ لە شووین خوەی وەجی هیلێد.
کۆلیژ شاهانەی تەندروسی لە بەریتانیا لە توێژینەوەێەگ ئاشکەرایکردییە زاروو ئەبێت وە لای کەم یەک سەعات وەرجە خەفتن ئامێرە ئەلکترۆنیەێلە دویر بکەفێد.
وەگوڕەی ئەو توێژینەوە وەکارهاوردن ئەو ئامێریلە وەرجە خەفتن خەو زارووەگە تێگ ئەدێد. روسێل ڤینەر سەرۆک کۆلیژەگە وە رووژنامەی سەن بەریتانی وتیە: ئەو وەختەی ئی تیشکە وەهێزێلە وەر مەغز کەفن ، بوونە هووکار کەمەوبۊین هۆرمۆن مێلاتۆنین ،یەیش خەو زەحمەتتر سەختەو کەێد.
بێجگە یە بوودە هووکار تمەڵی لە مێش چونکە کەمتر راهێنان وە مێشکی ئەکێد ، و خوەێ دورەو بگرێد لە دروسکردن پەیوەنی کۆمەڵایەتیەێلە و ناڕێکی لە جوویلەیان دروس بوود ، و ئەودە هووکارێگ ئەرا تووشهاتن وە فرە جوور لە بیماریەیلە جۊر : ـ ( ئۆتیزم ، شێرپەنجە ، شەکەتی و سەرژان ...) ک لەی سەردەمە فرە کەفنە وەر دیدمان.
داڵگ و باوگەێل بایەت وەرقەی وە زاروویەێلیان بیەن چەودێریان بکەن لەمەوقەی وەکارهاوردن تەکنەلۆژیا تا لە ئایندە رۊی وە رۊی ئی چشتەیلە نەکەفن هەمیشە زاڕوویەلیان لە تەندروسیەگ خاس دەروونی و جەستەیی بیاشتوون.
