بەغداد یاد شەهیدەیل کورد فەیلی کەێد

عەباس عەبد شاهين/ لە رووژیگ لاپەڕیگ رووشن و کاریگەر لە ژیاننامەی کورد فەیلی میژوو رازانەو، لە 6 ئایار 2025 نا شەهیدەیل کورد فەیلی نریا قەی یەکیگ لە جادەیل بەغداد، وە رێزگردن ئەرا قوربانیەیل ئاوارەکردن و بارکردن کوردەیل فەیلی رەسەن لە رووژەیل سیا لە میژوو نوو عراق، کە لە ناوچەی نەهزە دەسوەپی کورد ن زەنان ساحەت بەیروتا چوود تا رەسێدە دەورگرد شار سەدر، تا ناویگ هەڵگرێد کە یە دەیان ساڵە چەوەڕی کریەێد، تا بوودە یەکەمین گام لە بەغداد ناسنامەی کورد فەیلی وەشیوەی فەرمی هەڵگرێد.

 لە راسی جادەگە تەنیا ناویگ نییە بەڵکم گامیگ نیشتمانیە و دانوەپیدان فەرمیە و ئەرزش هێماییە دووارە رێز لە شەهیدەیلیگ گرێد کە رژیم بەعس تاوانکار خوازی هەر یاد و بویینیان لە هویرمان عراق سەرنقوم بکەێد، لەبان ریکارەیل ئیداری و بیرۆکراسی دویرودرویژیگ یە زیاتر لە هەشت ساڵە، وەلێ تەقەلایل فرە و وەردەوام لەلایەن بەرێز فوئاد عەلی ئەکبەر فەیلی ئەندام وەرین ئەنجومەن پارێزگای بەغداد، و سڵاکار ئیسە لە ئەنجومەن نوێنەرەیل سان بنەڕەت لە ئی کار گەورە دانا، کە هەر لە سەرەتاوە کەفتە شوین ئی پرسە وە رکداری سەختیگ و تویش ریگریەیل هات، تا رەسیە مووڵەت فەرمی لە لایەنەیل پەیوەندیدار، هەمیش بایەسە باس خانمە ئەندازیار نەجوا فەیلی بکەم ئەرا ئەو رەنجەیلە کە خوەی فەرمانبەرە لە ئەمیندارێتی، کە دەسمیەتی لەی سەرکەفتنە دا.

ئی دەسکەفتە تەنیا سەرکەفتن ئیداری نەوی، وەلێ خوەشی بردە دڵ خاوەن شەهیدەیل، جویر گامیگ دەروینی کە جی سوپاس و رێزە، نشان دتنوەپی فەرمی وەو ستەمە دەێد کە وەپییان رەسیە، و دووپات ئەرا شەریف و رەسەنەیل کورد فەیلی کەێد کە شەهیدەیلیان لەیاد نیەوەن، کە پەیامیگ ئاشکراس کە یاد قوربانیەیل لە ویژدانیان هەر مینێد، و هەرچەن وەخت بچوود هەر حەقەگە تیەێدەو و وە شەرەف و سەربازی نویسەیێد، و ئی بڕیارە بەڵگەیل قویلییگ دیرێد لە سنوور ناوناین رەد کەێد، تا بوودە جویر خاڵیگ ئاڵشتبوین لەڕی دانوەپیدان وە ستەمکاری میژووی وەبان کوردەیل فەیلی ئەرا دەیەیل درویژیگ، کە دویرخستن سیاسی و ئاوارەکردن زوورەملی و زیندانیکردن و کوشتن و زەفتکردن ناسنامە و ماڵ و دارایی، و سەرنقومکردن زیاتر لە 20 هەزار گەنج لەو ساڵەیل ئاگرە وەلایەن رژیم دیکتاتۆر لەناودریای لە هەشتایەیل سەدەی گوزەشتە.

   سوپاس و رێز ئەرا گشت ئەو دڵسووزەیلە کە لەپشت ئی پڕۆژەی نشتمانی گرنگە وسیان، و ئەرا هەر کەسیگ دەسمیەتی ئەرا وەجیهاتنی داگە دویای ساڵەیلیگ لە رەنج و تەقەلا، ئی دەسکەفتە هەر جویر نشانەی رووشنیگ لە میژوو کوردەیل فەیلی مینێد، و بەڵگەیگ زنە ئەرا ئەوە کە هەرچەنیگ ستەمکارەیل بخوازن بیدەنگی بکەن، هەر ری خوەی پەیا کەێد وەرەو ژیان و یەکسانی و دانوەپیدان.

"حەق جویر رووژە  هەر بایەسە باێد" .. پەنیگ يۆنانی.