"بیگانە لەناو میلکان خوەی" ژنیگ کورد فەیلی عراقی یە 40 ساڵە رەگەزنامە نەیرێد
پەیکەر شەهید فەیلی لە بەغداد
شەفەق نيوز/ لەناو یەکیگ لە ناوچەیل خوەرهەڵات بەغداد، ژنیگ وەناو "ئەمیرە عەبدولئەمیر عەلی" وەبی دەنگ ژیەێد، لە پشت ئەو بیدەنگیە ساڵەیل دویرودرویژیگ لە بیگانەیی لەناو وڵات خوەی شارێدەو، چماێ میوانە لەناو میلکان خوەی، وەلێ رووژیگ وە هاونیشتمانیگ فەرمی وەقەڵەن نەیریاس.
زیاتر لە چل ساڵ لە تەمەنی وەچەوەڕی بەڵگەیگ گوزەران کرد کە پەچسپنێد خوەی عراقییە.
"م هامە ئێرا.. وەلێ کەسیگ من نیەونێد"
ئەمیرە یەکیگە لە دەیان هەزار کوردەیل فەیلی، کە کەفتنە وەر نەهامەتی ئاوارەکردن زوورکاری، لە سەرتای هەشتایەیل سەدەی گوزەشتە، هەناێ دەسەڵاتەیل ئەو وەختە لە عراق ئەرا ئیران باریان کردن، و رەگەزنام لەلییان سەننەو، و ماڵ و دارایییان زەفت کردن، و دەسپیچگ "تەبەعیەی ئیرانی"، هەرچەن فرەیان لەناو عراق لەداڵگبوینە، و بنچینەی بەڵگەکریای لە شار و ناوچەیلی دیرن، وەتایبەت لە بەغدای پایتەخت، خانەقین، بەدرە، نوعمانیە، و کوت.
ئەمیرە لە ساڵ 1960 لە بەغداد لەداڵگبویە، و لە ساڵ بارکردنگە (1980) خوەی و باوانی لەشارەگەی وە زوور هەڵکەنیا، کە وەرەو ئیران باریان کریا، و لەورا شوی کردە هاوڵاتییگ عراقی، لەوانەگ لە جەنگ عراق و ئیران دەسوەسەر کریانە، و کاغەزیگ مارەبڕین نا شارستانی (مارەی شێخ) دیرێد، کە لەلای خوەیەو ژیان نوویگ دەسوەپی کرد، وەلێ رووزگار بیگانەیی زیاترەو کرد.
دویای رمیان رژیم سەدام حسێن لە ساڵ 2003، ئەو خیزانە ئەرا عراق گلەو خوارد، دی نەکردن کاغەزەیلیان لە فەرمانگەی رەگەزنامە توومار بکەن، و هویچ کاغەزیگ فەرمی ئەرایان نەوی، و دویای مردن شویەگەی، وەبی رەگەزنامە مەن، وەبی کاغەزیگ فەرمی، وەبی کەسیگ پشت وەپیا بوەسێد، کە تا ئمڕوو وەیجویرە مەنیە، بیبەش بوی لە خوەنەواری، لە کار، چەودیاریکردن تەندروسی، و هەمیش لە کارت خوەراک.
ئەمیرە تەنیا فایلیگ کویەنە دیرێد، بەشیگی دڕیاس، گریەبەسی مارەبڕین کوینەیگ هاناوی، و چەن کاغەزیگ ئەرا نیشتەجیبوینی، وەلێ یانە هویچیگ نیەکەن لە لەڕوی یاسا.
دویاترین هاوار
ئەمیرە خان ئمڕوو داوا لە حکومەت عراق، و محمد شیاع سودانی سەرۆک وەزیرەیل، و عەبدولئەمیر شمەری وەزیر ناوخۆ کەێد بنووڕنە کارەگەی، و رەگەزنامەی عراقی وە بڕیاریگ مرۆیی وەپی بیەن، لە بنەمای دەقەیل یاسایی لەی باوەتەیلە، ئەرا لاوردن ئەو ستەمە دویای چل ساڵ.
ئی ژنە نە رەگەزنامەیگ ترەک دیرێد، نەیش وڵاتیگ ترەک، کە لەڕی ئاژانس شەفەق نیوز داوا کەێد هەکاتی مەردمەیل وەگەردی رەفتار بکەن، تا چشتیگ لە سەروەری گومابویی گلەو بارن.
ئی پرس ئەمیرە لەلای مەردم کورد فەیلی چشتیگ جیاواز نییە، کە کوردەیل فەیلی هیمان تا ئمڕوو باج ئەو بارکردن و دووچەوەکی و جینۆسایدە دەن کە ئەرا دەیان ساڵ وەسەریان هات، هەرچەن بڕیارەیل حکومەتی دەرچگە ئەرا گلەوداین ڕەگەزنامە وە بارکریاگەیل، وەلێ سەدان کەس هەس، وەتایبەت لە ژنەیل، هیمان چەوەڕی جیوەجیکردنی کەن، لەناو گیچەڵ و ئاڵووزەیەیل ئیداری و بیرۆکراسی سەختیگ، و نەوین خوازینیگ راسگانی.
ئەمیرە خان لە کۆتایی داواکردنی وە ئەسر بیدەنگی تەواو کەێد: چماێ حەقیگ لە هویچ نەیرم، وەیجویرە ژیەم، نە ماڵ، نە بەڵگە، بی داڵگ وباوگ، تەنیا خوازم جویر ژنیگ عراقی بناسیەم، هەر یە تەنیا.
