سروشت کوردستان وە رەنگ داهێنەرانە.. 25 تابلۆ ئەرا هوشیاری ژینگەیی (وینە)
شەفەق نیوز- هەولێر
هونەرمەن شوەکار کورد رەزوان قادر، ئمڕوو سێشەممە، پێشانگا کەسییە نووەگەی لە شار هەولێر پایتەخت هەرێم کوردستان واز کرد، کە 25 تابلۆی هونەری لەخوەی گرد کە جوانی سروشت لە هەرێم کوردستان نشان دان، وە ئامانج کلکردن نامەیگ هوشیاری ئەرا کەمەوکردن پیسبۊن ژینگەیی و مقیەتیکردن سروشت.
پێشانگاگە وەپای پەیامنێر ئاژانس شەفەق نیوز، 25 تابلۆی هونەری جیاجیا لەخوەی گرد، کە هونەرمەنەگە تەکنیکەیل رەنگەیل جیاواز لەناوی وەکار هاورد، کە فرەی کارەیلە جەخ لەبان فرەچەشنی تۆپۆگرافیای سروشتی لە ناوچەیل هەرێم کوردستان کردن، لە کۊیەیل و دووڵەیل و رۊتەختە ئاوییەیل، وە لەخوەیگردن نامەیل ناڕاسەوخۆ کە گاڵ جەماوەر دەێد ئەرا مقیەتیکردن ئی ناوچەیلە لە پشتگووشخستن و رەسین بیناسازی و پیسبۊن.
هونەرمەن قادر، ئەرا ئاژانس شەفەق نیوز وت، کە "ئی پێشانگا تەنیا نیشاندانیگ چەوی ئەرا دیمەنە سروشتییە دڵڕفنەیل لە کوردستان نییە، بەڵکم هاوار و هاناخوازنیگە ئەرا هونەر لەوەراوەر ئەو پیسبۊن و ویرانکارییە کە رەسێدە ژینگەر ئەو 25 تابلۆ کە ئمڕوو پیشکەشیان کردم بەرهەم تەقەلایگە ئەرا چەن مانگیگ وەردەوام بۊ، کە لەناونی کڕەیل جوانی سروشتەگەمان و ئەو رخباریەیلە کە وەرەوڕۊی بوود گیریاسە ناو".
هەمیش وت: "نامە سەرەکییەگەم هوشیاری ژینگەییە، بایەسە هونەر خزمەت دۆسیەیل مرۆیی و نیشتمانی بکەێد، و گەوراترین رخباری کە ئمڕوو وەرەوڕۊ ناوچەیلمان بوودەو هەڵسوکەفتەیل هەڵەس وەرانەور وە سروشتر تواستم لەڕی تیکەڵکردن رەنگەیل سویەر و گەرم هۊر سەردانیکەرەگە بارمەو وەو نرخە جوانییە کە خاوەنییمن، کە هەوەجە کەێد گشتمان بجۊلیەیمن ئەرا مقیەتیکردنی وەرجە ئەوەگ کار لە کار بچوود".
پێشانگاگە پیشوازییگ لەلایەن هونەرمەنەیل و هاووڵاتییەیل و گرنگیدەرەیل وە کاروبار ژینگەیی و هونەری لە هەولێر وەخوەیەو دی.
ولەی چوارچیوە، مستەفا ئەحمەد، کە یەکیگە لە سەردانیکەرەیل پێشانگاگە، ئەرا ئاژانس شەفەق نیوز وت، کە "ئەو کارەیلە کە نیشان دریانە وە شیوەیگ راسەوخۆ دەس نەنە بان راسیەگە، تابلۆیەیل وینە رووشنەگەی سروشت کوردستان نشان دان، وەلی لە خود وەخت هیلێد وە قۊلی هۊر لە وەرپرسیاریەتیمان بکەیمنەو لەوەرانوەر ئی دیمەنەیلە. تیکەڵکردن هونەر وە نامەیل ژینگەیی گامیگ نایاب و دەگمەنە لە هەولێر".
لەلای خوەییشەو، مەحموود عومەر، کە سەردانیکەریگ ترەک پێشانگاگەس، لە قسەیلی ئەرا ئاژانسەگە دیاری کرد، کە "شیوەی وەکارهاوردن سا و رەنگەیل لەلایەن هونەرمەن رەزوان لە نشاندان هۊردەکارییەیل کۊیەیل و دووڵەیل لە هەرێم سەرسامکەر بۊ و هیلێد هەس وە ئەوە بکەید کە چماێ لەوەرانوەر دیمەنە سروشتییە راسگانییەگە وسایدە. ئی جۊرە چالاکییەیلە تەنیا وە پیشکەشکردن دڵخوەشی چەوی نیەوسن، بەڵکم شوینەواریگ هوشیاری قۊل لای مەردم هیلنەو".
