سەری بڕیایە.. کوشیان یەکیگ لە ناودیارترین ئەسارەیل سینەمای ئیرانی خوەی و ژنەگەی لە تەهران
2023-10-15T08:27:34+00:00
شەفەق نیوز/ دەسەڵاتەیل ئەمنی ئیرانی، ئمڕوو یەکشەممە، پەیاکردن تەرم یەکیگ لە ناودیارترین ئەسارەیل سینەما لە وڵاتەگە لە شار کەرج خوەرئاوای تەهران پایتەخت راگەیانن.
ئاژانس خەوەر خوەنەوارەیل (ئیستا) لە زوان گەورەی ماڵ سینەما لە ئیران محمد مەهدی عەسکەرپوور وت: دەرهێنەر سینەمایی ناودیار داریوش مهرجوی و وەحیدە محمدی ژنی وەکوشیای لەناو ماڵیان پەیا کریان.
لەلای خوەییش، پولیس شار کەرج دووپات لە کوشیان ئەو هونەرمەنە وەگەرد ژنەگەی کرد.
سەردار حەمید فەرماندەی پولیس وت: لە وەخت دیریگ شەو شەممە ئاگاداری وەی رویداوە رەسیە، و ئەفسەریگ رەسیەسە شوین رویداوەگە، کە لەورا لەناو ڤیلای خوەیان، داریوش مەهرجوی و ژنەگەی لە زیبادەشت مشکین ئاباد لە کەرج کوشیانە.
ئەو وەرپرس ئیرانیە دووپات کرد کە سەر مەهرجوی بڕیایە، وتیش؛ ئی تاوانە مدووی نەزانیایە، وەدەس کەسیگ یا چەن کەسیگ نەناسیاگ بویە، و تا ئیسە کەسیش نیەزانێد ئەڕا کوشیانە.
سایتەیلیگ خەوەری ئاشکرا کردن کە داریوش وەرجە چەن رووژیگ هەڕەشەی کوشتنی لەبان ئینیستاگرام ئەرای هاتیە.
