ئیران فەرمان زیندانیکردن لەبان ئەکتەریگ ناودار وە مدوو پاڵپشتیکردنی ئەرا خوەینیشاندانەیل دەرکەێد
شەفەق نیوز- تاران
رێکخراوەیل ئیرانی لە دەیشت، رووژ جمعە، راگەیانن کە دادگای ئیرانی فەرمان داگەسە بان ئەکتەر ئیلناز شاکردوست وە زیندانیکردن ئەرا ماوەی ساڵیگ وە مدوو پاڵپشتیکردنی ئەرا ئەو خوەینیشاندانەیلە کە وڵاتەگە لە کانوون دۊەم/ یەنایەر 2026 وەخوەیەوە دی.
ئاژانس خەوەر چالاکوانەیل ماف مرۆڤ (هرانا) و کەناڵ "ئمتداد" سەروەخوەی کە دیداریگ وەرد پارێزەر ئەکتەرەگە ئەنجام داگە، خەوەر دان کە دادگای وەدویاچگن ئەو فەرمانە کە لەبانی دەرچگە پەسەن کردگە کە هەمیش قەیەغەکردنی لە هەر چالاکییگ سیاسی یا هونەری یا لەڕی ئینتەرنێتەو ئەرا ماوەی دوو ساڵ لەخوەی گرێد.
رووز دەرچگن هەردگ فەرمان سەرەتایی و وەدویاچگن کە لەلایەن دادگای ئیرانییەو دەرچگنە نەزانریاگە.
وشاکردوست کە بەشداری لە دەیان فیلم کردگە دۊای چەن هەفتەیگ لە سەرکوتکردن خوەینیشاندانەیل راگەیان کە دۊای ئیسە لە وڵاتەگەی کار نیەکێد کە "بوو خۊن لەلی تیەێد".
ئەکتەرەگە لە شوبات/ فێبرایەر لەبان توڕ "ئینستاگرام" لەوەخت وازکردن فێستیڤاڵ "فەجر" سینەمایی ساڵانە لە تاران نویسا: "گرەو ئەرا برایەیل ئازیزم (کوشیاگەیل) کەم. چۊ کریەێد فێستیڤاڵیگ ئەنجام بیریەێد؟ بەشداری لە هیچ ئاهەنگیگ نیەکەم، و هیچ رۆڵیگ ترەک لەی زەوییە نیەۊنم کە بوو خۊن لێ تیەێد".
لەبان پەڕەی خوەی لە "ئینستاگرام" وتیش کە وەپی خاسترە بایکۆت پێشبڕکێیەگە بکەێد، وە وتن: "گیانم بەجەر ئی کارەساتە رخەوەر و تاوانکاری و میژووییە نەیرێد".
دەسەڵاتەیل ئیرانی وە سەرکوتکردنیگ خۊناوی لە سەرەتای کانوون دۊەم/ یەنایەر گوزەشتە نواگیریکردن ئەو بزووتنەوە بۊنەو کە لە کووتاییەیل کانوون یەکەم/ دیسەمبەر وە ناڕەزایەتی لەبان گرانی ژیان هەڵایسا.
فرەیگ نەکیشا کە بزووتنەوەگە ئاڵشت بۊ ئەرا ناڕەزایەتییەیل فراوانیگ دژ وە حکومەت کە رەسیە لووتکەی خوەی لە 8 و 9 کانوون دۊەم/ یەنایەر.
رێکخراوەیل ناحکومی قسە لەباوەت کەفتن هەزاران کوشیاگ لە ئەنجام ئی سەرکوتکردنە کەن، لە وەختیگ دەسەڵاتەیل ئیرانی دان دەنە کوشیان فرەتر لە سێ هەزار کەس، وەلی ئەو تونوتیژییە گلەو دەن ئەرا "کارەیل تیرۆریستی" کە وڵاتە یەکگرتگەیل و ئیسرائیل نەخشە ئەرای کیشانە.
ئیلناز شاکردوست کە تەمەنی 42 ساڵە، رۆڵ لە فرەتر لە 50 فیلم وە دریژایی دوو دەیە دایە، و چەن خەڵاتیگ لە فێستیڤاڵەیل سینەمایی لە ئیران وەدەس هاوردگە.
