گیبرتی.. و کارکردن لە دەرەیل بەهەشت
شەفەق نيوز/ رووزگار دویرودرویژیگ خوازیمن تا بزانیمن کە وینەی راسگانی جەهان یە نییە کە دوینیمن؛ یە جەهانیگ بیمارە، مینەی وینەیگ ترەک کەیمن مەگەر نویسانن و پەیکەرسازی و وینەکیشان پەیای بکەن.
واسینی ئەعرەج، لە روومان
"هویرمان ئاو"
ئایا کارکردن لە دەریگ برۆنزی 30 ساڵ وەپی چوود!
لە سومبولە مەزنەیل لە جەهان پەیکەرسازی (دەرەیل بەهەشت)ه، ئەرا هونەرمەن ئیتالی لورينزو گيبرتی، کە سومبولیگ پیرووزە لە جەهان هونەر، و سەرسام تەماشاکەری کەێد، و نەوەیلیگ لە هونەرمەن و میژوونویسەیل هونەر سەردان ئی دەرەیل برۆنزیە کردن، کە رەنگیان تەڵاییە،
گیبرتی (1378-1455) دویای ئەرکدارکرنی وەلایەن مەعمودیەت فلۆرانس، لە ساڵ 1425 دەسکردە سازین دەرەیل بەهەشت.
تەواوکردن ئی کارە 27 ساڵ وەپی چگ، 12 ساڵیان ئەرا نموونەیل و نەخشەیل سەرەکی، و 15 ساڵ ترەک ئەرا رەنگکردنی وە تەڵایی و سافەوکردنی، تا وەختیگ دەروازەی خوەرهەڵاتی مەعمودیەتەگە تەواو بوی، رەسیە ساڵ 1452.
دروسکردن دەرەیل لەو سەردەمە، کاریگ هونەری بوی کە خەرجی فرەس، چوینکە لە سەردەم گیبرتی، برۆنز لە مەڕمەڕ گرانتر بوی، و کارکردن وەردی سەخت بوی چوینکە قاڵبسازی پیشەسازی لەو سەردەمە نەوی.
ئەرا دروسکردن دەرەیل، گیبرتی وە مووم کار کردیاد، کە وەخت فرەیگ خوازێد.
لە سەرەتا، شیوەیگ وە خەڕگ یا مووم دروس کردیان، ئمجا خریەنە ناو قاڵب، ئمجا برۆنز تاویای رشننە ناو ئەو قاڵبەیلە تا سەردەو بوود.
دویای ئەوە کە گیبرتی برۆنز لەناو قاڵب دراورد، دەسکردە هویردەکاریەیل، وە کوتانن و سافەوکردن بان نەخشە زبرەیل.
لەی خوارە وینەیل (دەرەیل بەهەشت) بوینن:
