بیس و دوێیمین ژماره‌ی هه‌فتەنامەی گوڕان
شەفەق نیوز- سێزدەی دسامبر، بیس و دوێیمین ژمارەی هەفتە‌نامەی گوڕان، دە دوێیمین ساڵ بڵاو بیین خوەێ، هاتە بازار.
دە ئی ژمارە، وتارێ وە نام (کورونا و کەندڕەیل ئێجتماعیێ ک سازییە دە جامێعە) نریاگە و ئمجا خەوەرێ نریاگە ک مزگانی کارێگە دیاری لە ماموستا هادی زیادینی، پەیکەرتاش گەورای کورد. دە ئی هەواڵە لە سازین سەردیس و پەیکەرەی لە ماموستا مەحموود دەوڵەت‌ئابادی، نویسەر فارس‌زوان خوراسانی ک گەوراترین رومان‌نویسە وە زوان فارسی و دە فرە لە کتاوەیلە‌ێ، ئوو دە رومانە دیارییەی (کەلیدەر)، قارەمانەیلەی لە نام کورد کرمانج خوراسانی ئەڵبژاردگە، خەوەر دریاگە.
تیتر یەکم ئی هەفتەنامە‌یش لەێ‌واسە (توور توو فەرەنگی ئاوایی تووریوەر). دە ئی خەوەره و له زوان وه‌زیر میرات فەرهەنگی و گەشتیاری ئێران، وەیجوورە هاتگە: ئی ئاواییە وە ئاو و هەوایێگێ خاس و دڵخواز، هەم ئەڕا (توو فەرەنگی) ئەڵگرتن و هەم دە نەورووز هەر ساڵ، مێوانداری لە بڕ فرەیێگ لە گەشتیارەیلە دکەێگ ئوو بڵووزەی ئاگر نەورووز و رمەێ پاێ چووپی‌وازەیل و دە‌سگرەیل و ئەڵپەڕەکی‌کەرەیل، ئوو کوردەماڵەیلێ ک کریانەسە ماڵگەێ بوومگەردی لە جازبەیل گەشتیاری ئی دیەکەێ کەم‌وێنەنە.
ئی ئاواییە ها دە چل و پەنج کیلوومتری لاخوار سنە (سەنەندج)، دە لا رووژئاوای ئی شارە ک ناوەند ئوستان کوردستانە.
ئەڕا خوەنین PDFەگەی ئی گوڤار دوزوانە، کلگ بننە ئێرە و کرتە بکەن دە بانێ.
