ئاهەنگیگ مۆسیقایی لە نەوەیل دریژترەو بوود.. 639 ساڵ لە ژەنین وەردەوام لە کەنیسەیگ ئەڵمانی
شەفەق نیوز- وەدۊاچگن
لە کەنیسەیگ مبژوویی لە خوەرەڵات ئەڵمانیا، ئاهەنگیگ مۆسیقایی لە یەکیگ لە دریژترین تاقیکردنەیل هونەری لە جەهان وەردەوام بوود، کە پارچەیگ مۆسیقایی کە ئۆرگنیگ بۊچگ ژەنیەی وەرجە نزیکەی 25 ساڵ دەسوەپی کرد، و بڕیارە تا ساڵ 2640 وەردەوام بوود.
و پرۆژەگە لەناو کەنیسەی بورشاردی میژوویی لە شار هالبرشتات وەڕیەو چوود، کە لەناوی پارچەی ORGAN/ASLSP ئەرا دانەر ئەمریکی کووچکردگ جۆن کێج ژەنیەێد، لە نمایشیک کە پیلان ئەرا نریاگە 639 ساڵ وەردەوام بوود.
و دەسەواژەی ASLSP واتە "وە یەواشترین شیوەیگ کە بوود". و کێج ئی پارچە ئەرا پیانۆ لە ساڵ 1985 داناۊد، وەرجە ئەوەگ ئەرا ئۆرگن لە ساڵ 1987 دەسکاریی بکەێد، وەگەرد رێنماییگ ئەرا پیشکەشکردنی وە یەواشترین و ئارامترین شیوەیگ کە بوود.
پرۆژەگە لە ساڵ 2000 دەسوەپی کرد، لە وەختیگ پیشکەشکردنەگە لە 5 سێپتێمبەر/ ئەیلوول 2001 دەسوەپی کرد، لە ساڵیاد 89مین لەداڵگبۊن کێج، و پارچەگە وە راسی وە ئاوازیگ مۆسیقایی دەسوەپی نەکرد، بەڵکم وە بیدەنگییگ کە تا 5 فێبروەری/ شوبات 2003 وەردەوام بۊ، وەرجە ئەوەگ یەکەمین دەنگ ئۆرگنەگە بژنیەێد.
بڕیارە پارچەگە بڕەسێدە دۊایین ئاوازی لە 4 سێپتێمبەر/ ئەیلوول 2640.
ماوەی پیشکەشکردنەگە کە رەسێدە 639 ساڵ هەڵوژریا لەوەر میژوو ئۆرگنیگ ناودیار لە هالبرشتات کە گلەو خوەێد ئەرا ساڵ 1361، واتە 639 ساڵ وەرجە دەسوەپیکردن پرۆژەگە.
لە ئاب/ ئۆگۆست 2026، کەنیسەگە مەوقەی نوویگ لەی پیشکەشکردنە وەخوەی دی، وەختیگ زیاتر لە 150 کەس گردەو بۊن ئەرا وەدۊاکەفتن ئاڵشتکاری هەڤدەهەم لە پێکهاتەی دەنگی لە وەخت دەسوەپیکردن پرۆژەگەو، کە لۊلەیگ هەشتەم وە دەس خریا بان ئۆرگنەگە، دۊای ئەوەگ ئامادەبۊیەیل گووش دانە پێکهاتە وەرینەگە کە لە هەفت ئاواز هاتۊد.
دۊای چەن خولەکیگ لە گووشداین ئەرا پێکهاتە نووەگە، چەپڵەڕیزان لەناو کەنیسەگە دەنگ دا، لە وەختیگ پرۆژەگە تەنیا نزیکەی 4 لەسەد لە ماوەی گشتیی خوەی تەواو کردۊد.
ئۆرگنەگە هەوەجە وە ژەنیاریگ نیریەد کە وەردەوام لەوەرانوەری بنیشێد، چۊنکە پەمپیگ کارەبایی مقیەتی لە هەمیشەیی وا لەناو لۊلەیل و وەردەوامبۊن دەنگەگە کەێد، لە وەختیگ سەرپەرشتیارەیل پرۆژەگە وەختەیل ئاڵشتکردن ئاوازەیل وە دەس دەسوەردان کەن.
ئاڵشتکاری بانان لە 5 ئۆکتۆبەر/ تشرین یەکەم 2027 بوود، وەختیگ پێکهاتەی ئیسە لە هەشت دەنگەو وەرەو هەفت کەمەو بوود.
و ئەرا دڵنیاییکردن لە وەردەوامبۊن گرنگیداین وە پرۆژەگە تا وەخت کووتاییهاتنی، سەرپەرشتیارەیل بلیتیگ کۆتایی کە شایەت ئاڵشتبۊن و میراتگرتنە خستنە روو، کە ری وە هەڵگرەی دەێد ئامادەی ئاهەنگ کووتایی لە ساڵ 2640 بوود لە وەرانوەر بەشدارییگ کە رەسێدە 2640 یۆرۆ.
وەي جۊرە پارچەیگ مۆسیقایی کە کێج لە سەدەی گوزەشتە داناسەی ئاڵشت بۊ ئەرا پرۆژەیگ هونەری کە لە تەمەن نەوەیل تەواویگ رەد کەێد، چۊنکە کەسەیلیگ دەسوەپی کردنە کە زانن کە کووتاییەگەی نیەژنەفن، و ئەرک وەدۊاکەفتن ئاوازەگە ئەرا نەوەیل هاتگ تا ساڵ 2640 وەجی هیلن.
