مردن مناڵیگ ٥ ساڵان دویای ئەوە کە دگانیگی کیشان
2023-11-18T13:41:34+00:00
شەفەق نیوز/ رووژنامەی Hürriyet، ئمڕوو شەممە، وت: وەڕیەوبەرایەتی تەندروسی لە ویلایەت بۆرسەی تورکیا، نووڕینگەیگ پزشکی دگان وە نووک سوور بەسایە، دویای مردن مناڵیگ لەتەمەن ٥ ساڵان، لە ئەنجام کیشان دگانی.
باوگ و داڵگ مناڵەگە یەلینا و ئایدن سونمیز ئەرا پولیس وتن: وەرجە ماوەیگ سەردان نووڕینگەیگ پزشکی دگان کردنە، ئەرا خاسەوکردن دگان کوڕەگەیان.
پزشکەیل لەژیر سڕکردنەوەی گشتی یەک دگانی کیشانە، و چوار دگان تریش پڕەو کردنە، و مەوقەی ئەو نەشتەرگەرییە، خوین لە ئاروو مناڵەگە وەربویە، و تەوی گردیە، و دوسکردیەسە لەرزین، وەگەرد ئەوەیش، پزشکەیل دەرمان ئەرا مناڵەگە نویسانە، و ئەرا ماڵ کلیەو کردنە.
لەماڵ، ئەو مناڵە کەفتە تەو و لەرز، و باوگ و داڵگی ئەرا خەسەخانەی حکومەتی بردنەی، وەلێ پزشکەیل نەتوەنست چارەیگ ئەرای بکەن، تا دویای سێ رووژ ئەو مناڵە گیانی لەدەسدا.
دەسەڵاتەیل ئەو نووڕینگە تا ماوەی شەش مانگ بەسان، و دەسکردنە لێکۆڵینەوە، و باوگ مناڵەگە وت: پزشک سڕکردنەوە هویچ تاقیکردنیگ نەکرد، و چگە ریەو، و چەوەڕی نەکرد مناڵەگە دویای نەشتەرگەری باێدە هووش.
