ماڵ چەرمگ گورانیەیل تەیلۆر سویفت لاوەێد

شەفەق نیوز- واشنتۆن 

بڕیگ لە گورانیەیل خانمە گورانیچڕ ئەمریکی تەیلۆر سویفت لە پارچەیل ڤیدیۆیی بڵاوکریای هەڵمەت سەرۆک ئەمریکی دۆناڵد ترمب و کۆشک چەرمگ لەبان ماڵپەڕەیل پەیوەندی کۆمەڵایەتی لاوریا، دۊای وەکارهاوردن دوو گورانی ئەرا ئەسارەگە لەماوەی هەفتەی گوزەشتە.

 ئاژانس "رۆیتەرز" وت کە هەڵمەتەگە دوو گورانی سویفت لە بڵاوکریایەیل لە ری هەژمارەگەی لەبان سەکوو "تیک تۆک" وەکار هاورد، وەرجە لاوردن گورانیەیل لە بڕیگ پارچە ڤیدیۆ، لە وەختیگ ماڵ چەرمگ یا نوێنەریگ لە گورانیچڕەگە وەڵام داواکاریەیل لێدوان نەیانە.

وەکارهاوردن گورانیەیل سویفت لە بڵاوکریایەیل خاوەن سروشت سیاسی هات، چۊنکە یەکیگ لە پارچە ڤیدیۆیەیل دەسکاری ناونیشان و وشەیل شمارەیگ لە گورانیەیلی کرد ئەرا رەخنەگردن لە سیاسەتەیل وەڕێوەبەرایەتی سەرۆک وەرین جۆ بایدن و جیگرەگەی کامالا هاریس، وەگەرد لێدوانداین لەبان دۆسیەیل کووچبەرەیل و سنوورە باشوورییەیل ویلایەتە یەکگرتگەیل.

 یەکیگ لە پارچە ڤیدیۆیەیل نیشانەیل ئەرا ئەلبوم سویفت "رێد" لەخوەی گرد، وەگەرد بەسانن ناونیشانەگەی وە ئەو رەنگە کە گریەدریاس وە حزب کۆماری، وەگەرد وەکارهاوردن ناونیشان گورانیەیل ترەک جۊر "گشت چشتیگ ئاڵشت بۊ" و "هەرگیز وەیەکەو نیەتیەمنەو" لەناو لێدوانەیل سیاسی رەخنەی هەنەکی.

 سویفت لەماوەی هەڵوژاردنە سەرۆکایەتییەیل ئەمریکی ساڵ 2024 پشتیوانی خوەی ئەرا هاریس راگەیانیۊد، و وەرجەیەیش لەماوەی هەڵمەتە هەڵوژاردنەگەی لە 2020 رەخنە لە ترمب گردۊد، کە یەیش هیشت پەیوەندی ناوەین هەردوو لایەنەگە بوودە جی گرژی سیاسی دووبارەبۊ.

 ترمب وەڵام پشتگیریکردن سویفت ئەرا هاریس دادەو وە رەخنەگردن لەلی وە ئاشکرا، و دۊای ئەوە گلەو خوارد ئەرا پەلامارداینی لە ری ئامرازەیل پەیوەندی کۆمەڵایەتی.

 ناڕەزایەتییەیل تەنیا لەبان سویفت نەوین، کە دەیان هونەرمەن، لەناویان سابرینا کارپێنتەر و ئاریانا گراندێ، داوا لە وەڕێوەبەرایەتی ترمب کردن کە کارە مۆسیقیەیلیان لە بڵاوکریایەیلی وەکار نارێد.