پیپسی لۆگۆی خوەی ئاڵشت کەێد
وەگورەی ویستگەی "سێ ئێن ئێن" ئەمریکی، کۆمپانیاگە نووڕیە ک هەنای داوا لە بسینەیل کەێد وینەی لۆگۆی پیپسی لە هویرمانیان بکیشن، هەمیشە خڕیگ دروس کەن و کڕ سوور و چەرمگ و کەو کیشن، و لەناوڕاسی وشەی پیپسی.
ووشەی پیپسی لەناوڕاس خڕەگە نییە، ک خوەی لە کنارەو نویسیاگە، وەلێ رکداری هویرمان بسینەیل ئویشێد وشەگە کەفێدە ناوڕاس، ک هیشت کۆمپانیاگە دروشمەگە ئاڵشت بکەێد.
ماورو بورسینی گەورەی وەرپرسەیل دیزاین لە کۆمپانیای پیپسی ئەرا تووڕ سی ئێن ئێن وت: نەبایەت ئیجویر نووڕینیگ بخەیمنە پشتگووش، ک بڕیار دایمن وەو شیوە بنووڕیمن.
کۆمپانیای پیپسی ئاشکرای لۆگۆ و هیمای بازرگانی نووی کرد، ک ئەوەسا لەی پاییزە خریەێدە بازاڕەیل ئەمریکای باکوور و لە ساڵ ئایندە خریەێدە جەهان.
لۆگۆ نووەگە مینێدە شیوەی سەردەم نەوەتەیل، ک دیارە لەناو هویرمان مەردم پەنگ بەساگە، وەلێ وەگەرد چشتەیل نوویگ، تا زیاتر سەردەمیانە بوود.
لۆگۆ نووەگە جویر تووپیگە وە رەنگ سوور و چەرمگ و کەو، و رزبەنی رەنگەیل ئاڵشت بویە، و رەنگ چەرمگ زاقتروو بویە، وەگەرد وشەی پیپسی وەرەنگ سیا لەناوڕاس تووپەگە.
