زەویلەرزەی کۆڵۆمبیا.. شاکیرا پەیمان دەێد 10 مەکتەو دروس بکەێد و زەرەدەیل کارەساتەگە رەسیە 10 ملیار دۆلار

شەفەق نیوز- وەدۊاچگن

ئەسارەی گورانیچڕ کۆڵۆمبی شاکیرا، پەیمان دا دەسمیەتی بەێد لە دروسکردن 10 مەکتەو نوو لەلای کەمەو لە ناوچەیگ دۊرەدەس لە وڵاتەگەی کە تویش زەویلەرزەیگ ویرانکەر بۊە لە هەفتەی گوزەشتە و بۊە مدوو کوشیان سەدان کەس.

 شاکیرا دۊکە دووشەممە سەردان کیبدۆ کرد، پایتەخت هەرێم چۆکۆی کۆڵۆمبی، کە لەورا سەردان مەکتەوە زەرەدمەنەیل کرد، و باوەش وە خوەنەوارەیل کرد و وینە وەگەردیان گرد.

 ئەرا رووژنامەنووسەیل وت: "فرەترین چشتیگ کە نیگەرانم کەێد ئەوەسە کە مەکتەوەیل دووارە دروس نیەکریەین دەسوەجێ دۊای کووتاییهاتن ئی رەوش پەلە، هەر رووژیگ کە مناڵەیل نیەچنە مەکتەو رووژیگە کە دەرفەتەیل لەدەسیان چن لە بانانیان".

 هاوارد بافێت، کوڕ ملیاردێر و پیاو کارەیل خێرخواز وارن بافێت، یاوەری شاکیرا کرد، و بڕیارە دامەزراوەی هاوارد جی  بافێت وەگەرد دامەزراوەی "فۆنداسیۆن پیس دیسکالسۆس" یا (دامەزراوەی پایەیل پەتی) لە پرۆژەگە هاوکاری بکەن.

لە لای خوەییشەو، سەرۆک کۆڵۆمبی ئەبیلاردۆ دی ئیسپریا دووپات کرد کە زەرەدە ئابوورییەیل هاتگ لە زەویلەرزە تونەگە کە هەفتەی گوزەشتە وڵاتەگە لەرزان شایەت بڕەسێدە 30 تریلیۆن پیزۆ (9.58 ملیار دۆلار).

 دی ئیسپریا زیاتر وت کە ئەو زەرەدەیلە کە رەسینەسە باڵەخانەیل مەزەنە کریەێد وە نزیکەی 24.5 تریلیۆن پیزۆ لە وەختیگ زەرەدەیل ژیرخان رەسیەسە 5.5 تریلیۆن.

هەمیش وت "تەنیا هویریگ لە قەوارەی کارەساتەگە بکەنەو"، و دەسنشان ئەرا ئەوە کرد کە ئی شمارەیلە وەگەرد وەخت شایەت ئاڵشت بوون.

 وتیش "یە شمارەیگ سەرەتاییە کە راسەو کریەێد مەوقەی دەسخستن زانیارییەیل زیاتر و هەڵسەنگاندن ئەو زەرەدەیلە کە ئی زەویلەرزە لە هەر ناوچەیگ بۊەسە مدووی".

جی باسە کە زەویلەرزەیگ وە هاز 7.4 پلە وە پەیمانەی رێختەر لە 10ی ئاب لە کۆڵۆمبیا دا، و 265 کوشیاگ هیشتەو، و سەنتەر زەویلەرزەگە نزیک بۊ لە شار سان خۆسێ دیل پاڵمار لە کەرت چۆکۆ لە خوەرئاوای کۆڵۆمبیا.