زیرەکی دەسکرد رەسێدە مردگەیل
لە پارچە ڤیدیۆی بانگەشەگە، ڕیو سۆن-یۆن لەوەردەم مایکرۆفۆن و شاشەی گەپیگ نیشێد، هاوسەرەگەی نشان دەێد ک چەن مانگیگ وەرجە ئیسە مردگە، و وەپی ئویشێد: "نازارەگەم یە خوەمم"، ئەویش دەسنەێدە گیری و دەس کەێدە قسەکردن وەگەردی، وەگورەی قسەی ئاژانس فرانس پرس.
دویای ئەوە ک زانستیە تویش شێرپەنجەی مەرگبار هاتگە، ئەو بازیکەر تەمەن ٧٦ ساڵەی کۆریای باشوور وەناو لی بیونگ-هوال، پەنا وە کۆمپانیای Deep Brain AI بردگە، ک چەن ساعەتیگ ڤیدیۆەگە توومار کردگە، تا برۆگرام دیجیتاڵی ئەرای دروس بکەێد ک بتوەنێد وەڵام پرسیارەیلی بەێد.
جۆزێف مێرفی، وەرپرس بەش گەشداین کۆمپانیاگە لەباوەت ئەو بەرنامە وەناو "ReMemory" ئویشێد: "ئیمە رستە و باوەت نوویگ دروس نیەکەیمن"، واتە ئی تەکنەلۆژیا واژە و رستەیل نوویگ دروس نیەکەێد ک مردیەگە لە ژیان خوەی نەوەتیەسەی یا نەنویساسەی.
خود بنەما لەلایەن کۆمپانیای "StoryFile"ەو پەسەن کریەێد، ک ئەکتەر تەمەن ٩٢ ساڵ ویلیام شاتنەر جویر روخسار پرۆپاگەندە لە سایتەگە وەکرا هاتیە.
ستیڤن سمیس، سەرۆک ئەو خزمەتگوزارییە، ک هەزاران کەس وەکاری تیەرن، وەپەی کۆمپانیاگە، ئویشێد "رینمای ئیمە ئەوەس ک سیحر ئەو کەسە تا ماوەی فرەیگ لە ماوەی ژیان بمینێد، ئیجا زیرەکی دەسکرد وەکار باریمن".
ئەو پەیامە لە تووڕ کۆمەڵایەتی تویتەر بڵاو کریاگە، کەفتە وەر لافاو رەخنە، یەیش هیشت دویای چەن رووژیگ ئاشکرا بکەێد ک خوەی "قەور هەڵکەن" نییە، سمیس وتیش "یە باوەتیگ فرە کەسییە، لە دڵەو داوای وەخشین کەم ک ئازار خەڵک دامە".
هەرلیوا لە وڵات چین، کۆمپانیایل تایبەتمەن لە رێکخستن پرسەی مردگەیل باس توانای وەکارهاوردن زیرەکی دەسکرد کرد لە پرسپوو وە شیوەیگ هیمایی وەگەرد ئەو کەسەیلە ک سەرەخوەشی کەن.
دویای مردن یارەگەی لە رویداویگ هاتوچو لە ساڵ ٢٠١٥، خانمە ئەندازیار رووسی یوجینیا کیودا ک لە ویلایەت کالیفۆرنیا نیشتیە، "ڕۆبۆتێگ دەمەتەقە" دروس کرد، ک ناوی ڕۆمان بوی، وەناو یارەگەی ک مردگە، و هەزاران پەیام کوڵ لەناوی دانا ک لە ژیان خوەی ئەرا کەسوکارەیلی کل کردیە، تا چشتیگ دروس جویر واژەیل خوەی دروس بکەێد.
لەلای خوەییش کۆمپانیای "سۆمنیۆم سپەیس" ک بنکەگەی لە لەندەنە، تەقەلا دەێد پشت وە میتاڤێرس بوەسێد ئەرا دروسکردن چاپیگ هیمایی ئەرا وەکارهاورەیل لە ماوەی تەمەنیان، ک بوونیگ تایبەت بیاشتون، وەبی دەسوەردان ئایەم، لەی جەهانە هاوشیوە لە دویای مردنیان بمینێد.
وەڕێوەبەر گشتی کۆمپانیاگە، ئارتور سیچۆڤ، دان وەوە نەێد ک ئی خزمەتگوزارییە ئەرا گشت کەسیگ نییە، بیگومان لە ڤیدیۆ کلیپیگ ک لە یوتیوب بڵاوی کردگە، لەباوەت بەرهەم کۆمپانیاگە وەناو " ئەرا ژیان هەمیشەیی"، ک راگەیان نیاز دیرێد لە کۆتایی ئمساڵ دەسوەپی بکەێد .
