توێژینەوەیگ خەو ئەرا فرەتر لە 9 سەعات بەسێدەو وە بەرزەوبۊن رێژەی مردن
شەفەق نیوز- وەدۊاچگن
توێژینەوەیگ ئاشکرا کرد کە خەفتن ئەرا فرەتر لە نۆ سەعات لە شەویگ پەیوەندی وە بەرزەوبۊن رێژەی مردنەو دیرێد لە وەرانوەر خەفتن ئەرا ماوەیگ لە ناوەین حەفت و هەشت سەعات، لە وەختیگ ئی چین دۊاییە نزمترین رێژەی مردن تومار کرد لە ناوەین ئەو بەشداربۊیەیلە کە وەدۊاچگن ئەرایان کریا ئەرا ماوەی سێ دەیە.
توێژەرەیل تایوانی وەدۊاچگن کردن ئەرا نەریتەیل خەو لەلای فرەتر لە 3 هەزار کەس ئەرا ماوەی 30 ساڵ، و دیین کە رێژەی مردن رەسیە 10.57 کەس ئەرا هەر هەزار کەسیگ لە ناوەین ئەوانەگ لە هەفت تا هەشت سەعات لە شەو خەفن، کە نزمترین رێژەس کە لە توێژینەوەگە تومار کریاگە.
رێژەگە بەرزەو بۊ ئەرا 10.97 کەس ئەرا هەر هەزار کەس لە ناوەین ئەوانەگ کەمتر لە شەش سەعات خەفن، لە وەختیگ رەسیە 11.27 کەس لە ناوەین ئەو کەسەیلە کە فرەتر لە نۆ سەعات لە شەو خەفن.
توێژینەوەگە مدووەیل دووپاتکریاییگ دیاری نەکرد کە پەیوەندی ناوەین دریژی ماوەی خەو و بەرزەوبۊن رێژەی مردن ئاشکرا بکەێد، وەلی توێژەرەیل دەسنشان کردن ئەرا ئەوەگ ئەو کەسەیلە کە ئەرا ماوەیگ دریژتر خەفن شایەت فرەتر بکەفنە وەر بەرزەوبۊن پەستان خۊن و هەوکردنەیل، کە هەردگیان دوو مدوون پەیوەندی وە شمارەیگ لە کیشەیل تەندروسییەو دیرن، کە بیمارەیل دڵ و جەڵتەیل مێشک لەناویانیە.
هەمیش توێژەرەیل دیاری کردن کە فرە لە خەفتن شایەت کاریگەری لەبان سەعات بایۆلۆجی لەش بیلێد، و رێکخستن هۆرمۆنەیل، و توانای سیستەم وەرگری.
وەپەی توێژەرەیل، پەیمانەکردن ماوەی خەو شایەت بوودە بەشیگ لە وەشکینە پزیشکییە رۆتینییەیل، وە شیوەیگ کە دەسمیەتی دەێد لەبان دیاریکردن ئەو کەسەیلە کە فرەتر کەفنە وەر بڕیگ لە رخەیل تەندروسی.
ماوەی خەو دریژ، وەپەی توێژینەوەیل وەرین، پەیوەندی دیرێد وە شمارەیگ لە کیشەیل تەندروسییەو، کە بیمارەیل دڵ و شەکرە لە جۊر دۊەم و چاخی و لاوازی هووش لەناویانیە، وەلی ئی پەیوەندییە مەرج نییە ئەوە بوود کە خەو دریژ مدوو راسەوخۆ بوود ئەرا ئی مردنەیلە.
تەمەیش کریەێد وە شیوەیگ گشتی وە دەسخستن ماوەیگ لە ناوەین هەفت تا نۆ سەعات لە خەو لە هەر شەویگ.
