باب سەرای.. بازاڕ سابوون سرووشتی لە مووسڵ (وێنە)
شەفەق نيوز/ تا پا نەێدە بازاڕ باب سەرای لە شار مووسڵ، بوون سابوون لەو شۊینە ئاشکرا بوود. لە کۊیچەی تەنگە، خاسترین چینەیل سابوون حەلەب فرووشیەێد، ک مووسڵیەیلە وە شیوەی گەورەیگ وەکاری تێرن وەتایبەت گەورە تەمەنییان.
سابوون حلەب وە سێ چین ناسریاگە خ ئەوەیش وەگورەی ئەو بڕ رۊین زەیتوونە یا رۊین گڵەسەرە ک لەناوی هەس، و هەر چینەیگ وەکار خوەی تیەێد.
ئەحمەد عەبدولڕەحمان، سابوون فرووشە، ئەرا ئاژانس شەفەق نیوز وت: سابوون حەلەب خاسەگە ئەرا سناو و پاکەوکردن وەکار تیەێد، و ئەو سابوونە ک رۊین زەیتوون یا رۊین گڵەسەر هاناوی ێەرا خاسەوکرد چەن چشتیگ جۊر رزیان گیس و بیماری چەرم و بیماریەیلیگ تر وەکار تیەێد.
رەنگەیل جیاجیا
هەرلیوا خ عەبدولجەبار مەحمود ئەرا ئاژانس شەفەق نیوز وت: جاروبار رەنگ سابوونەگە جیواز بوود هەرچەن لە خود چینەگەس، ئەوەیش چۊنکە سابوونەگە کۆنەس، ک سابوونە نووەگە رەنگی کاڵە و وەگەرد ساڵەیلە رەنگی خەسەو بوود، و هەنای نووڕێدە تو سابوونەگە تەمەنی زانێ. وتیش؛ سابوونە نووەگە رەنگ ناوەگەی گشتی سەوزە، و هەرچەن ساڵەیل لەبانی رەد بوون، ئەو سەوزیە کەمەو بوود، و گرانترەو بوود، و سابوون هەس ک تەمەنی ١٠ ساڵە، و هۊیچ خراوییگ لەلی نییە باوەجی سوودی فرەترە.
مەحمود باس کەێد ک فرەترین هاوردەی بازاڕەگە لە حلەب تیەێد، وەلێ بەرهەم ناوخۆیی لە بەعشیقە هەس، و هەمیش مووسڵیەلە ک لە تورکیا جیگر بۊینە لەورا کارەگا دیرن، و سابوون هەناردە کەنە شارەگە.
نرخەیل سابوونەگە
نرخ یەک کێلو سابوون رۊین زەیتون هالە نزیکەی ٥ هەزار دینار، و سابوونە کۆنەگە وە ٧ هەزار فرووشیەێد، و سابوون رۊین گڵەسەر رەسێدە ١٠ هەزار دینار.
مونعم تەها پیرە مەردیگە، دووپات کرد ک یە زیاتر لە ٤٠ ساڵە سابوون حەلەبی لەی بازاڕە سینێد،.و.لە حەمام وەکاری تیارێد،.و قەت سابوونیگ تر نێوەند.
تەها ئەرا ئاژانس شەفەق نیوز وت: وەردە ٢٠ ساڵ یەکەم جاری بۊی سابوون وەکار بارێد، و گیچەڵ لە گیسی داشت و تەنیا سابوون خاسیەو کرد، و لەو مەوقە تا ئیسە واز لەلی نیارێد،.وتیش؛ بازاڕ باب سەرای لە مووسڵ کۆن خاسترین شۆنە ک سابوون لەلی ببینێ.
