کابرایگ ئەمریکی ١٩١ جار تەماشای فیلمیگ کەێد و چوودە ناو کتاو گینس

شەفەق نیوز/ ئۆگەستین ئالانیس پیاویگ ئەمریکییە، دویای ئەوەگ ئەرا 191 جار تەماشای فیلم سینەمایی' Avengers: Endgame' لە سینەما کەێد، ناوی چیە کتاو گینس.  

ئۆگەستین لە هەژمار خوەی لە تویتەر وێنەی خوەی دانایە و بڕوانامەی گینس هادەسیەو لە شانی وینەیگ خوەی وەگەرد تیم کارکردن لەبان فیلمەگە دانریاگە، و نۊسایە "من وە راسی سەرسامکەرم، نازناو فرەترین ئامادەبوین ئەرا خود فیلم لە کتاو گینس وەدەس هاوردم."  

وەگورەی راپۆرتیگ ک گینس لە ری ماڵپەرەگەی بڵاوی کردیە، ئۆگەستین فرە سەرسام بویە وە کەسایەتی "رۆجەرز"  ک لە فیلمەگە وە "کاپتن ئەمریکا" ناسریاگە، ک ئەکتەر ئەمریکی کریس ئیڤانز لە فیلمەگد ئەو رۆڵە دییە.