کەمەوبوین هاتوچو بەلەمەیل باربەر لە تەنگەی هۆرمز وە نزمترین ئاست لە 3 مانگ گوزەشتە
شەفەق نیوز ـ وەدویاچگن
داتایەیل سەرەتایی کۆمپانیای "کەپلەر" کە وەدویاچگن ئەرا بەلەمەیل ئەنجام دەدێد، ئمڕوو سێشەممە، نیشان دەن هاتوچو بەلەمە باربەرەیل کە کەلوپەلە سەرەتاییەیل هەڵگرن لە تەنگەی هۆرمز رەسینەس نزمترین ئاست لە هەفت ئایار/مایوی گوزەشتەوە.
وەپای داتاگە، تەنیا یەک بەلەم رووژ دووشەممە تەنگەگەی بڕیە، دویای هاتن تانکەریگ گەورە گاز لە کەنار عومانەو، وە بەراوورد وەگەرد شەش بەلەم لە جویرە جیاوازەیل کە رووژ یەکشەممە تەنگەگە بڕینە.
داتاگە نیشان دەن کە ژشمارەیل هێمانگ سەرەتایین و توەنێد ئاڵشتبوود، وەتایبەت چوینکە بڕیگ لە بەلەمەیل لە وەخت رەدبوین لە تەنگەگە دەسگایەیل کلکردن و وەرگردن زانیاریەیلیان ناچالاک کریاس.
سکرتێری گشتی نەتەوە یەکگرتووەیل، ئەنتۆنیۆ گوتێرێس، ئمڕوو دووشەممە هوشداری دا پەلامارەیل وەردەوامن و هاتوچوی کەشتیوانی لە تەنگەی هۆرمز و دەریای سوور پەکخریاس، هاتوچوی وزە و چیمەنتوو و کەلوپەلە سەرەتاییەیل ئاڵۆز دەکەێد.
گوتێرێس لە وتەیگ نوای نەتەوە یەکگرتگەیل دەربارەی ئازادی هاتوچو دەریایی وت: پەلامارە پەیوەندیدارەیل وە جەنگ لە ئۆکرانیا هەڕەشە لە ریگەیل گرنگی کەشتیوانی کەن کە کلکردن نەفت و دانەوێڵە و بەرهەمە کشاوەرزیەیل لەری ئەنجام درێد، و دیاریکرد ئێ قەیرانەیل رەگەیل بازرگانی جیهانی خنکنن و فشاریگ تون وە بان سیستەم خوەراکی جیهانی دروس کەن، کە ئەنجامەگەی بەرزبوین نرخەیل و زیایبوین ورسگی و کەمەوبوین بەرهەم کشاوەرزی و زیایبوین ژان چینە کەم توانایەیل کۆمەڵگەیە.
