خانەقین ئامادەکاری کەێد ئەرا ڤیستیواڵ خورما و هونەرەیل میللی وە بەشداریکردن پەنجا بەشداربوی و 300 جویر لە خورما

شەفەق نیوز - خانەقین

شار خانەقین لە پارێزگای دیالە، ئامادەکاری کەێد ئەرا دەسوەپیکردن یەکەمین ڤیستیواڵ خورما و هونەرەیل میللی، وە بەشداریکردن نزیکەی 50 نمایشکەر و زیاتر لە 300 جویر لە خورما، و لەلایگ کەسەیل دەسڕەنگین  و هونەرمەنەیل و تیپەیل هونەری لە ناوچەیل عراقی و هەرێم کوردستان، لە چالاکییگ کە گوشەیل بازرگانی و گەشتوگوزاری و رووشنهویری گردەوکەێد.

سەرۆک کۆمیتەی باڵای سەرپەرشتیکار لەبان ڤیستیوالەگە و ئەندام ئەنجومەن ئیدارەی ماڵ شەهید سەلام رووشنهویری، حسام ئەلدین ئاغا، ئەرا ئاژانس شەفەق نیوز وت:  ماڵەگە گشت ئامادەکاریەیل تایبەت وە ڤیستیواڵەگە تەواو کردیە،  دیاریکرد چالاکییەیل لەماوەی سێ رووژ ئەنجام دریەێد، لە 9 تا 11 تشرین یەکەم/ ئۆکتۆبەر، لە کورنیش نووەگەی خانەقین.

ئاشکرایکرد، لە  ڤیستیواڵەگە نزیکەی 50 کەس بەشداربوود، لە وەختیگ زیاتر لە 300 جویر لە خورما نیشان دریەن، وە بەشداریکردن خاوەن زەوی و باخەیل هاتگ لە ناوچە جیاجیاگەیل پارێزگای دیالی.

وتیش؛ چالاکیەیل هەمیش بەشداری خاوەن کارەیل دەسڕەنگینی و بەرهەمە ناوخوەیەیل ناوچەیل هەرێم کوردستان وەخوەی دوینێد، وە ئامانج دروسکردن دەرفەت ئاڵشتکردن رووشنهویری و بازرگانی، و ئەوزەڵداین وەردەوام لەناوەین خانەقین و ناوچەیل ناوڕاس و باشوور عراق و هەرێم کوردستان.

دیاریکرد، ڤیستیواڵەگە تەنیا وە لایەن بازرگانی سنووردار نەویە، بەرنامەیلیگ هونەری و رووشنهویری جوراوجویریش گرێدەخوەی، وە بەشداری شمارەیگ لە هونەرمەنەیل شار خانەقین لەناویان گەنجان خانەقین و شمارەیگ گورانیچڕ و هونەرمەنەیل ناوخوەیی.

وتیش؛ بەرنامە هونەرەیل بەشداریکردن تیپیگ هونەرە کۆمەڵایەتیەل لە سلێمانی و تیپ وەزارەت روونهویری و گەننجەیل حکومەت هەرێم کوردستان وەخوەی دوینێد، وەرد تیپیگ هونەری ترەک لە سلێمانی کە بڕیارە ئەرا ئەنجامداین چالاکی روی بکەنە خانەقین.

لەلایەن شێوەکاری ئاغا ئاشکرایکرد، شمارەیگ لە هونەرمەنەیل شێوەکار لە ناوچە جیاوازەیل عراق بەشدارن، لەناویان کوردستان و بەغدا و بەسرە و کەربەلا و نەجەف و ئەنبار  و موسڵ، لە چوارچمگ سمبۆزیۆمیگ هونەری تەرخانکریاگ ئەرا کیشان و توومارکردن سروشت شار خانەقین و رەنگینەگەی.

دووپات کرد، هەڵوژاردن کورنیش نوو خانەقین  ئەرا ڤیستیواڵەگە چشتی زیاتر بەخشێد، وتیش لە چالاکیەیل وازکزدن کۆڕنیش نووەگەس، لە گامیگ وە ئامانج بکرێدە شوین  چالاکییەیل رووشنهویری و هونەری و گەشتوگوزار لە شارەگە.