کوشیان دوو کەس لەناو دوکانیگ خاسەوکردن ماشین لە قەزای کەلار

شەفەق نیوز ـ گەرمیان

سەرچەوەیگ ناوخوەیی و وەچەودیەیل، ئمڕوو یەکشەممە، خەوەردان لە کوشیان دوو کەس لەناو دوکانیگ خاسەوکردن ماشین لە ناوچەی پیشەسازی سەر وە قەزای کەلار ناوەن پارێزگای "گەرمیان" لە هەرێم کوردستان.

شایەتحالەیل وە ئاژانس شەفەق نیوز وتن، یەکیگ لە کوشیاگەیل خاوەن دوکانەگەس و ئەوەکەیش هاوڕییە، لەناو دوکانەگە پەیاکریان و شوین گولە هالەقیان لە رویداویگ نادیار.

یەکیگ ل خاوەن دوکانەیل لای وت، کوشیایەگە ناوی "وەستا محەمەدە" و تاوانەگە دویەشەو دیر وەخت رویدایە، دووپاتکرد ئەو کەسە کوشیاس کەسیگ فرە لەسەرخوەی بوی دوژمنایەتی وەرد کەس نەداشت.

هێزەیل ئەمنی ئاخڵەی شوین رویداوەگە دان و لێکۆڵینەوە وازکردن ئەرا ئاشکراکردن چوینیەتی تاوانەگە و لایەنەیل پشتی، ماشین فریاکەفتن تەرم دوو قوربانیەگە ئەرا پزیشک دادوەری کلکرد.