وای تونیگ دەێدە دەربەندیخان و بوودە مدوو زەرەد لە توڕ کارەبا (وینە)
شەفەق نیوز- سلێمانی
وەڕێوەبەرایەتی گشتی کارەبای سلێمانی، ئمڕوو شەممە، خەوەر دا کە بەشەیلیگ لە توڕ کارەبا لە قەزای دەربەندیخان زەرەد وەپیان رەسیە وە مدوو وایگ تون کە داگەسە ناوچەگە، لە وەختیگ دەسەیل هونەری وەردەوامن لە کارەیل خاسەوکردن ئەرا گلەوداین تەوژم ئەرا گشت ئەو ناوچەیلە کە زەرەد وەپیان رەسیە.
وەڕێوەبەرایەتیەگە لە بەیاننامەیگ رەسیە ئاژانس شەفەق نیوز دیاری کرد کە وایگ تون دۊای نیمەڕوو دۊکە جمعە 18 ئەیلول/ سێپتەمبەر ئیسە، لە دەربەندیخان و دەورگردی هەڵکردیە، و بۊسە مدوو زەرەد لە توڕەیل کارەبا لە شمارەیگ لە گەڕەک و ناوچەیل.
وەڕێوەبەرایەتیەگە دیاری کرد کە دەسەیل خاسەوکردن تا سەعاتەیلیگ دیر لە شەو وەردەوام بۊنە لە کارکردن ئەرا چارەسەرکردن پەککەفتنەیل و گلەوداین تەوژم کارەبا ئەرا هاووڵاتییەیل.
لە لای خوەیەو وەڕێوەبەر بەشەوکردن کارەبای دەربەندیخان، باسیت عەزیز، وت کە "وا تونەگە بۊسە مدوو زەرەد لە شمارەیگ لە سەرچەوەیل کلکردن کارەبا لەناو دەربەندیخان و دەورگردی، هەمیش بۊسە مدوو رمیان دوو ستۊن کارەبا لە ئۆردوگای خوارین، و ئمڕوو کار کەیمن ئەرا ئاڵشتکردنیان وە دوو ستۊن نوو".
وتیش کە "زەرەدەیل هەمیش بڕیان تەڵەیل کارەبا لە بڕیگ شوین لەخوەی گردیەسەو، لە شان سزیان چوار بڕەر ئەرا محەویلەیل وە مدوو رۊداین شۆرت کارەبایی".
عەزیز دیاری کرد، کە "دەسەیل هونەری تا سەعاتەیلیگ دیر لە دۊشەو کار کردنە و تۊنستنە تەوژم کارەبا ئەرا نزیکەی نیمەی ئەو ناوچەیلە گلەو بیەن کە زەرەد وەپیان رەسیە"، وە دووپاتکردن لەبان "وەردەوامبۊن کارەیل خاسەوکردن ئمڕوو تا وەخت چارەسەرکردن گشت پەککەفتنەیل و گلەوداین کارەبا ئەرا ناوچەیل ترەک".
