وە شەشەم چاپ.. هەولێر میوانداری فێستیواڵ بەڕهەمەیل ناوخوەی کەێد (وینە)

شەفەق نیوز- هەولێر

شار هەولێر پایتەخت هەرێم کوردستان، میوانداری چالاکییەیل شەشەمین پێشانگای بڕهەمەیل ناوخوەی وە بەشدارییگ فراوان و پێشوازی جەماوەری کەێد.

بڕیارە کارەیل پێشانگاگە، لە شوینیگ وەرانوەر پارک "شانەدەر"، ئەرا ماوەی شەش رووژ وەردەوامی بکیشێد، کە رووژانە دەرەیلی خوەی لە سعات چوار ئیوارە تا 12 نیمەشەو وە روی  سەردانکەرەیل واز کەێد.

سەرپەرشتیار پێشانگاگە، سالار مەحموود، ئەرا ئاژانس شەفەق نیوز وت: "پێشانگاگە زیاتر لە 400 دەروازە ئەرا فرووشتن بڕهەمەیل ناوخوەی تایبەت وە گەشتیارەیل و سەردانکەرەیل لەخوەی گرێد"، و دیاری کرد کە "گشت بەڕهەمەیل نیشاندریاگ بەڕهەم ناوخوەین وەرڕێژەی 100% و لەناو زەوی کوردستان دروست کریانە".

مەحموود  وتیش؛ "سازدان ئی پێشانگایەیلە بەشیگە لە چالاکی بازرگانی و ئاڵوگۆڕ فەرهەنگی، چوینکە بەشداربویەیل لە ناوچەیل جوراوجویر هەرێمەو هاتنە و هەوەجە وە دەروازەیل کەن ئەرا بازاڕکردن بەڕهەمەیلیان"، و دووپاتکرد وەبان "گرنگی رێکخستن ئی جویرە چالاکییەیلە لە هەولێر و   شارەیل سەرەکی ترەک ئەرا بەهێزکردن جویڵەی بازرگانی و ناسانن بەرهەم نیشتمانی".