وە بەشداری فراوان ناودەوڵەتی.. دەسوەپیکردن خول 29 لە ڤیستیواڵ گەلاوێژ لە سلێمانی (وینەیل)
شفق نيوز- سلێمانی
چالاکییەیل ڤیستیواڵ فەرهەنگی گەلاوێژ، لە سلێمانی، ئمڕوو پەنجشەممە، دەسوەپیکرد وە بەشداری ئەدیبەیل و هونەرمەندەیل و رووشنهویرەیل لە عراق و چەندین وڵات عەرەبی و ئەورووپی، لەناو بەڕنامەیگ فەرهەنگی و هونەری جویراوجویر کە تا سێ رووژ وەردەوام بوود.
سەرپەرشتیکەر و رێکخەر خول بیست و نۆیەم لە ڤیستیوالەگە، ئیبتسام ئیسماعیل، ئەرا ئاژانس شەفەق نيوز وت "چالاکییەیل ڤیستیوالەگە لە ساعەت سێ ئیوارەی ئمڕوو دەسوەپێکەێد، لە هۆڵ تەلار هونەر لە شار سلێمانی، و خولەگە ناو ئەدیب سامی هادی لەخوەی گرێدەخوەی، ئەرا رێزگرتن لە کاروان و بەشداریی فەرهەنگییەگەی".
ئیسماعیل وتیش؛ "بەڕنامەی ڤیستیوالەگە بڕیگ فرە لە چالاکی فەرهەنگی و هونەری گرێدەخوەی، کە دیارترینیان ئاهەنگیگ موسیقیە کە تیپ راستاک سازی کەێد، وەرد رێکخسن پێشانگایەیل کتاو و هونەرەیل شێوەکاری ناودەوڵەتی و وینەگری فۆتۆگرافی، بیجگە چالاکییەیل شیعری و ئەدەبی وە بەشداری شمارەیگ لە شاعیرەیل و نویسەرەیل".
ئاشکراکرد "چالاکییەیل رووژ دویەم و سێیەم لە ساعەت نۆ و نیم شەوەکی دەسوەپێکەن، و کۆڕ لەخوەی گرێد و وەرد دانشتنەیل گفوگو و فەرهەنگی و فکری، لە کۆتایی خەڵاتەیل بەش کریەێد وەبان بەشداربویەیل و رێزگریاگەیل لەناو چالاکییەیل فێستیواڵەگە".
دەربارەی ئەندازەی بەشداری ناودەوڵەتی، ئیسماعیل دووپاتکرد "ئێرنگە میوانداری شمارەیگ فرە لە ئەدیبەیل و هونەرمەنەیل و نویسەرەیل و کەسایەتییەیل فەرهەنگی دیار لە پارێزگایەیل جویراوجویر عراق کەێد، بیجگە لە بەشداربویەیل و میوانەیل لە ئەڵمانیا و سوێد و ئیتالیا و بەریتانیا و قوبرس و قەتەر و لوبنان و ئوردن، وەگەرد کەسایەتییەیل فەرهەنگی لە ناوچەیل جوراوجویریل کوردستان".
دیاریکرد "ڤیستیواڵەگە تا سێ رووژ وەردەوام بوود، و کەسایەتییەیل فەرهەنگی و هونەری لە ناوخوەی عراق و دەیشت کۆ کەێد، لە چوارچمگ وەهێزکردن پەیوەنی و ئاڵشتکردن فەرهەنگی و هونەری لەناوەین بەشداربویەیل".
