وەڕێۆبەر خەسەخانەیگ لە سلێمانی: تووشهاتنەیل کۆڕۆنا وەرێژەی ٥٠٪ لەماوەی ئادار بەرزەو بوی
شەفەق نیوز/ خەسەخانەیگ تایبەت وە تاقیکردنەوەی تووشهاتنەیل ڤایڕۆس کۆڕۆنا لە پارێزگای سلێمانی، ئمڕوو دووشەممە، دووپات کرد لە بەرزەوبوین ژمارەی تووشهاتنەکان وەڕێژەی ٥٠٪.
دکتۆر سەرخێڵ ئاراس وەڕێۆبەر خەسەخانەی عەلی ناجی ئەرا تاقیکردنەوەی ڤایڕۆس کۆڕۆنا ئەرا ئاژانس شەفەق نیوز وت: ژمارەی سەردانکەرەیل ک گومان لە تووشهاتنیان وە ڤایڕۆس کۆڕۆنا هەس، وە رێژەی ٥٠٪ لە مانگ کانون یەکەم و شوبات گوزەیشتە بەرزترەو بوی.
ئاراس دیاری کرد ک ژمارەی سەردانکەرەیل خەسەخانەگە ئەرا تاقیکردنەوە لە دوو مانگ گوزەیشتە رەسیە ١٠٠ - ١٥٠ کەس، و لەی مانگ ئادارە رەسیە ٢٠٠ - ٢٥٠ کەس لە رووژیگ.
وتیش؛ وەگورەی مەزنەکان ک نیم سەردانکەرەیل خەسەخانەگە تووش ڤایڕۆسەگە وە چوار چینەگەی هاتنە و لە جووراجور تەمەن و رەگەزەیل.
وەڕێوبەر خەسەخانەی عەلی ناجی بانگواز ئەرا هاووڵاتییەکان وە چەودیریکردن رینما تەندروسیەکان و مقەیەتیەکان وەشیوەی تەواویگ کرد، و پابەندبوین وە رینما تەندروسیەکان و وەکارهاوردن دەمامەک ودیروکەفتن کۆمەڵایەتی، ئەرا نواگردن لە تووشهاتن وە ڤایڕۆس کۆڕۆنا یا گواستنەوەی پەتاگە.
