هەولێر هوشداری دەێد لە رخباری تافاوەیل و داوای دروسکردن بەنداوەیل بۊچگ کەێد
شەفەق نیوز - هەولێر
ئەنجومەن پارێزگای هەولێر، رووژ دووشەممە، هوشداری دا لە وەردەوامبۊن رخباری تافاو و لافاوەیل کە هەڕەشە لە شارەگە کەن لە ماوەی وەرز واران، وە داواکردن ئەرا دانان پلانیگ گشتگیر ئەرا چارەسەرکردن کێشەگە لە بنەڕەتەو، کە جیوەجیکردن پرۆژەیل ئاوی و دروسکردن بەنداوەیل بۊچگ لەخوەی گرێد ئەرا کەمەوکردن رشیان ئاوەیل لە ناوچە بەرزەیلەو وەرەو ناوڕاس شارەگە.
سەرۆک ئەنجومەنەگە، عەلی رەشید، ئەرا ئاژانس شەفەق نیوز وت، کە تەقەاایەیل حکومەتی ئەرا چارەسەرکردن کێشەی تافاوەیل وەردەوامە، وەلێ هەوەجە وە پلانیگ هۊردتر و گشتگیرتر دیرێد ئەرا کەمەوکردن ئەو رخباریەیلە کە هەڕەشە لە شارەگە دەن، و وە تایوەت لە ماوەی هەردوگ وەرز پاییز و زمسان.
رەشید ئاشکرا کرد کە شوین جوگرافی هەولێر هیلێد رۊوەرۊی رشیان بڕیگ فرە لە ئاوەیل بوود لە ناوچە بەرزە دەوروگەردەیلیەو، لەڕی پەنج رێڕەو ئاوی یا فرەتر، کە وەرەو ناوچە نزمەیل لەناو شارەگە چن، وە دەسنشانکردن ئەرا ئەوە کە رخباریەیل دووقاتەو بوون وەختیگ بڕ وارانەیل لە ئاستەیل سروشتیی یا مەزەنەیل ئاووهەوایی رەد کەن.
شار هەولێر پایتەخت هەرێم کوردستان، رووژ 7 تشرین دۊیەم/ نۆڤەمبەر ئیسە، وارانیگ بیوینە وەخوەی دی کە رەسیە 80 ملیمەتر تەنیا لە ماوەی دوو ساعەت، کە بۊە هووکار بەرزەوبۊنیگ ناکاوی لە ئاست ئاوەیل، و قوربانییەیل خستەو و شمارەیگ فرە لە دانیشتگەیل خستە رخباری.
لەباوەت ئی تافاوەیلە، رەشید دۊنێد کە چارەسەر بنەڕەتی ئەرا کێشەگە هەوەجە وە جیوەجیکردن بڕیگ لە پرۆژەیل دیرێد لە ناوچە دەوروگەردەیل هەولێر، کە وەرەونواچگن توڕەیل وەدەرنان ئاو و پرۆژەیل ئاویاری لەخوەی گرێد، وەرد دروسکردن گوڵەمەیل ئەرا گردەوکردن ئاو وارانەیل و بەنداوەیل بۊچگ کە دەسمیەتی دەن لە رێکخستن رشیان تافاوەیل و کەمەوکردن رەسینيان ئەرا ناوچە نیشتەجیەیل.
دووپات کردە بان هەوەجەی ئەوەگ پرۆژەیل ئاڵشتکردن رێڕەو تافاوەیل دۊر لە ناوڕاس هەولێر نەونە مدوو چگن رخباریەیل وەرەو کۆمەڵگە نیشتەجیەیل و ئاواییە دەوروگەردەیل شارەگە، وە هوشیارکردن لەوە کە چارەسەرە نەسەنجریاگەیل شایەد ئەو ناوچەیلە بخەنە وەر رخباری لافاوەیل هاتگ.
دووپاتیش کرد کە چارەسەرکردن کێشەگە تەنیا لەبان جیوەجیکردن پرۆژە ئەندازیارییەیل نییە، بەڵکم هەوەجە وە پلانیگ تەواو و هەماهەنگییگ وەردەوام لە ناوەین لایەنە پەیوەندیدارەیل کەێد، لە شان چەودیاریکردن رەوش ئاووهەوایی و رێڕەو ئاوەیل وە شیوەیگ رێک.
داوای هازدارکردن سیستەمەیل هوشیارکردن زۊینە کرد و ئامادەکاری وەرجەوەختە ئەرا شەپۆلەیل واران فرە، وە شیوەیگ کە ری وە تیمەیل فریاکەفتن و لایەنە پسپۆڕەیل بەێد تا ریکارە خوازیاگەیل وەرجە رۊداین تافاوەیل بگرنە وەر، و کەمەوکردن رخباریە چەوەڕیکریاگەیل لەبان دانیشتگەیل و سامانەیلیان.
پارێزگار هەولێر، ئومێد خۆشناو، دۊکە یەکشەممە، ئەرا ئاژانس شەفەق نیوز، دووپات کرد لە وەردەوامبۊن کارەیل ئەو دوو دەسە کە لێکۆڵینەوە و مەزەنە لە زیانەیل ئەو لافاوە کەن کە هەفتەی گوزەشتە دا لە شارەگە، وە دیاریکردن ئەوە کە راپۆرتەیل دەسوەجێ دۊای تەواوبۊن لە ئامادەکردنیان راگەیەنریەن.
دەزگای خێرخوازی بارزانی ئاشکرای زەرەدمەنبۊن 1447 شوین و زیاتر لە هەزار ماشین کرد، لە شان زیانەیل مادی کە رەسینە 547 خیزان لەئەنجام شەپۆل لافاوەیل ئی دویایە لە هەولێر.