هەولێر ئامادەس ئەرا گفتوگۆەیل نوویگ وەگەرد بەغداد

هەولێر ئامادەس ئەرا گفتوگۆەیل نوویگ وەگەرد بەغداد
2021-04-21T09:19:14+00:00

شەفەق نیوز/ ئومێد سەباح سەرۆک دیوان ئەنجومەن وەزیرەیل هەرێم کوردستان، ئمڕوو چوارشەممە، راگەیان حکومەت هەرێم ئامادەکاری ئەرا دانووستانەیل نوویگ وەگەرد حکومەت فیدڕاڵی کەێد، ئەرا جیوەجیکردن بەندەیل بوودجەی ساڵ ٢٠٢١، و دووپات کرد ک هەولێر پابەندە وە رێککەفتن بوودجەگە.

سەباح لە وتاریگ ئەرا رووژنامەنووسەیل لەناویان پەیامنێر ئاژانس شەفەق نیوز بوی، وت: ئیمە دیریمن ئامادەکاری ئارا ئەوە کەیمن ک شاند هەرێم سەردانیگ تر ئەرا بەغداد بکەێد، و ئاماژە کرد ک ئی گلە دانووستانەیل وەگەرد بەغداد کەفنە چوارچیوەی جیوەجیکردن، و ئیمە لە هەرێم کوردستان ئامادەییمان ئەرا جیوەجیکردن رێککەفتنەگە لەناوبەین هەولێر و بەغداد لە بوودجەگە نشان دایمن.

وتیش؛ مەسرور بارزانی سەرۆک حکومەت هەرێم کوردستان، پەیامیگ ئەرا موستەفا کازمی سەرۆک وەزیران لە حکومەت فیدڕاڵی کل کرد، ک ئامادەیی تەواوەتی ئەرا جیوەجیکردن هەر پابەندییگ لەبان کوردستان لەناوی نشان دا.

Shafaq Live
Shafaq Live