هەناردەی نەفت هەرێم لەبان مێز نێچیروان بارزانی و دیشت تورکیا
شەفەق نیوز/ نێچیروان بارزانی سەرۆک هەرێم کوردستان، ئمڕوو سێشەممە، وەگەرد بیریس ئەکینجی خانمە جیگر وەزیر دەیشت تورکیا، باس باوەت هەناردەی نەفت ئەرا تورکیا کرد.
سەرۆکایەتی هەرێم کوردستان لە بەیاننامەیگ رەسیە ئاژانس شەفەق نیوز وت: هەردوگ لایەن باس پەیوەندییەیل ناوەین تورکیا و عراق و هەرێم کوردستان کردن، وەگەرد زوورهاوردن وەبان هاوکاری هاوبەش لە باوەت وزە و وەڕیەوبردن سامانەیل ئاو، وەگەرد تەقەلایل دووارە هەناردەکردن نەفت هەرێم کوردستان.
دوو لایەن باس ئومیدیان کردن لە بڕیاردان یاسای بودجەی گشتی عراق، جویر گامیگ گرنگ ئەرا زەمینەسازی لە وەردەم دووارە هەناردەکردن نەفت، و باس ئامادەکاری و ریکارەیل هونەری و یاسایی لە کار هەناردە کردن، و کاریگەرییەیلی لەبان ئابووری عراق و هەرێم کوردستان.
لەلای خوەییش، نێچیروان بارزانی وت: دووارە هەناردەکردن نەفت هەرێم، کەفێدە بەرژەوەنی عراق وەگشتی، و داهاتەیل دارایی زیایەو کەێد، و دووپات لە ئامادەیی کوردستان کرد ئەرا قایمکردن هاوکاری وەرد تورکیا لە کەرت وزە.
لەلای خوەییش، ئەکینجی دووپات لە خوەشاڵیی وە لەیەکفامستن ناوەین هەولێر و بەغدا لەبان دووارە هەناردەکردن نەفت، دووپاتی لە پشتگیریکردن تەواو ئەنقەرە ئەرا ئی کارە کرد، و وەگەرد وەرپرسەیل لە هەرێم کوردستان باس باوەت ئاو کرد، و ئامادەیی تورکیا نشان دا ئەرا هاوکاری هاوبەش لە وەڕیەوبردن سامانەیل ئاو، و رەفتارکردن وەرد کاریگەرییەیل ئاڵشتبوین کەشوهەوا وە هەماهەنگی وەرد عراق.
لە دیدارەگە باس بڕیگ باوەت گرنگ کریا، وە ئامادەبوین قونسوڵ گشتی تورکیا لە هەرێم کوردستان.
عەبدولەتیف جەماڵ رەشید سەرۆک کۆمار عراق، ئمڕوو سێشەممە، واژوو کرد لەبان یەکەم راسەوکردن یاسای بودجەی فیدڕاڵی عراقی، لەباوەت هەناردەی نەفت هەرێم کوردستان لەڕی کۆمپانیای "سۆمۆ".
