هەزاران خانەوادەیل عەرەو نفووسیان خەنە خانەقین و وەرپرسیگ هوشداری لە "تەعریبکردن دیمگرافی" کەێد
شەفەق نیوز/ وەرپرسیگ حزبی کورد لە دیالە، ئمڕوو یەکشەممە، ئاشکرای هاوردن لیستەیل مەدەنی لەلایەن هەزاران خانەوادەی عەرەو ئەرا خانەقین کرد، لە هەڵمەتیگ تەعریبکردن دیموگرافی بەرنامەدار.
ئیبراهیم حەسەن وەرپرس راگەیانن یەکێتی نیشتمانی کوردستان- رێکخستن خانەقین، ئەرا ئاژانس شەفەق نیوز وت ئامارەیل فەرمی دەسنشان ئەوە کەن ک زیاتر لە ٢٠٠٠ خانەوادەی عەرەو نفووسیان هاوردنەسە ناوچەیل دەیشت و ناو خانەقین، و کووچبردن خانەوادەیل کورد لەوەر هەڕەشەیل تیرۆری وە پاڵپشتیکردن سیاسی وەکار هاوردنە.
دووپات کرد ک فرەی دانیشتگەیل کورد لە زیاتر لە ٢٠ ئاوای لە دەورگرد خانەقین میلکان هیشتنە جی ک ری ئەرا خانەوادەیلیگتر واز کرد تا شوین ئەو کووچبەریل کوردە بگرن، وتیش؛ هاوردن لیستەیل نفووس لەلایەن خانەوادەیل عەرەو وەردەوامیە لە زنجیرەی تەعریبکردن دیموگرافی بەرنامەدار.
حەسەن باس بردن فرەی پۆستەیل کورد لە خانەقین کرد و داگیرکردنی وەبی هەماهەنگی و گلەوخواردن ئەرا هیزەیل کورد لە خانەقین، ک یە وە پشتگووشخستن ئاشکرایگ ئەرا پیکاتەی کورد لە خانەقین دریەێدە قەڵەم.
حەسەن داوای وسیان کارەیل پەراویزخستن و تەعریب لە خانەقین کرد ئەرا مقەیەتیکردن ناسنامەی نەتەوەیی و میژووی و مقەیەتیکردن وەیەکەوژیان ئاشتەوایی و کۆمەڵی.
