هەرێم کوردستان.. پلانیگ "هەشتی" ئەرا پیشوازیکردن لە ٢٠ مەلیۆن گەشتیار ساڵانە
شەفەق نیوز/ ئەمەل جەلال خانمە سەرۆک دەزگای گەشتوگوزاری لە هەرێم کوردستان، ئمڕوو شەممە، دانان پلان درویژ ماوەیگ راگەیان تا هەشت ساڵ وەردەوام بوود، وپلانیگتر ناوڕاس وکوڵ، لەباوەت گەشەپیدان گەشتوگوزاری، وهەمیش مەزەنە کرد شمارەی گەشتیارەیل ساڵانە بڕەسێدە زیاتر لە ٢٠ مەلیۆن.
ئەمەل جەلال لە کۆنگرەیگ رووژنامەوانی ئاژانس شەفەق نیوز ئامادەی بوی وت: زیاتر لە دوو مەلیۆن گەشتیار لە یەکەم چوار مانگ ئی ساڵە هاتنەسە ناو هەرێم کوردستان، ومەزەنە کرد لەماوەی ئی ساڵە زیاتر لە ٦ مەلیۆن گەشتیار باێدە ناو هەرێم.
وتیش: لە ماوەی دوو ساڵ بانان، شیوەیل پلانەگە وە ئاشکرا دیار دەێد، ئەگەر گشت خوازینەیل لە بینایل ژیرین و ئاسانکاری ئیداری، ویەکەوکردن وکەمکردن باجەیل دابین کریا، ک ئەوە نرخەیل ناو هەرێم وەگورەی دەوڵەتەیل هاوسا گرانەو کەێد.
ئەمەل خان وتیش: دەزگاگە لەناو پلانەگەی ئەوە دانایە ک هەر پارێزگایگ پڕۆژەی گەشتوگوزاری جیای خوەی بیاشتاد، تا بتوەنێد گەشتیارەیل ئەرا گشت ناوچەیل هەرێم کوردستان بکیشێد.
هەرلیوا، وەڕێەوبەرایەتی گەشتوگوزاری پارێزگای هەڵەبجە، وەناوهاتن زیاتر لە پەنج هەزار گەشتیار ئەرا ناوچەیلی راگەیان، وباس پلانیگ ئەمنی ئەرا پیشوازیکردن لە گەشتیارەیل کرد وەگەرد دەسەیگ هاوبەش لە قایمقامیەت و پارێزگاگە.
وەڕێەوبەرایەتیەگە لە بەیاننامیگ رەسیە ئاژانس شەفەق نیوز وت: (تەنیا دویەکە جمعە) پیشوازی لە زیاتر لە ٥ هەزار گەشتیار کردیە، فرەیان لە پارێزگایل ناوڕاس و باشوور هاتنە، وسەیرانگەی ئەحمەد ئاوا خاوەن بەشە گەورەگە بوی.
