نادیە موڕاد هاندان جیوەجیکردن رێککەفتنەگەی شەنگال کەێد
شەفەق نیوز/ مەسرور بارزانی سەرۆک حکومەت هەرێم کوردستان، ئمڕوو یەکشەممە، پێشوازی لە نادیە موڕاد چالاکوان ئەیزیدی کرد ک لەدەس داعش رزگار بویە.
لە سەرەتای چەوپیکەفتنەگە، سەرۆک وەزیران جەخت کرد ک بایەدە حکومەت هەرێم کوردستان گشت تەقەلاگانی ئەرا سووکەوکردن لە زیانەیل برا و خوەشکە ئەیزیدیەگان بیەێد، و ژیان گونجیاگ ئەرایان دابین بکەێد، و مسۆگەر كردن چگنەوەی ئاوارەگانیان وەرەو میلیکانیان، و دووپات کرد ک ئەیزیدیەگان پێکهاتەی رەسەن و گرنگن لەناو گەل کوردستان.
سەرۆک حکومەت وت: هەرێم کوردستان پشتگری مافە شەرعیەگان ئەرا ئەیزیدیەگان کەێد، وەتایبەت ک سەدان لە جەنگاوەرەیل پێشمەرگە ئەرا رزگارکردن شەنگال لە چنگ ریخریاگ داعش شەهید بوین، ئەراوە بایەدە گونجانن رەوشەگان شەنگال بکریەن، وەوجوورەگ هاتنەوەی ئارامی ئەرا ناوچەگە مسۆگەر بکەێد.
چالاکوان نادیە موڕاد دووپات کرد لە گرنگی خەسەوکردن تەقەلاگان ئەرا زانستن چارەنووس دوێەتە رفیایەگان و بیسەرەوشوونە ئەیزیدیەگان و ئازادکردنیان و هاوردنەوی ترمەیل گشت قوربانیەیل ئاوای کوجو، و هەمیش داوای جیوەجیکردن رێککەفتن شەنگال وەزویتربن وەخت کرد ئەرا وەدەسهاوردن ئارامی و داد و ئاشتی ئەرا ناوچەگە.
هەمیش لە کۆبونەوەگە جەخت کریا لەبان گرنگی سزادان وەرانوەر ئەو تاوانەیلە ک دژوە ئەیزیدیەگان کریان، ئەەوەیش وە هەماهەنگی وەگەرد تیم لێکۆڵینەوەی سەروە نەتەوە یەکگرتووەگان (یونایتد) ئەرا بتەوکردن دادکردن لە تاوانەیل داعش.
